Qırımtatar Milliy Meclisiniñ reisi Refat Çubarov Azatlıq Radiosına intervyü berir eken, Kahovka suv elektrik stantsiyasınıñ dağılması işğal etilgen Qırımnıñ agrar saasına tesir etti, amma anda yeterli qadar içimli suv bar, dep bildirdi.
"Kahovka suv elektrik stantsiyası bentiniñ patlatılması neticesinde Şimal Qırım kanalından suv yarımadağa artıq aqmay. Bu suv esasen agrar saası, suvarma içün qullanıla edi. Ve bunda Qırım qıyınlıqlar çekecek. İçimli suvğa ve kommunal hocalıqqa kelgende bu sene ava vaziyeti sayesinde Qırımnıñ suv anbarları tolu. Ve bu yılnıñ soñuna qadar yarımada işğalden azat etilmese suv yeterli olacaq", - dep ayttı Çubarov.
Onıñ sözlerine köre, kelecekte Qırımda suv ile bağlı "büyük qıyınlıqlar" ep bir çezilmeli olacaq.
"Çünki biz azat etilüvden soñ ukrayin Qırımınıñ inkişafını tüşünemiz. Ve suv teminatı meselesini çezmek kerek olacağını añlaymız. Kanal vastasınen suv teminatını eski alına ketirmek kerek olacaqmı ve bu kene bir bentni qurmaq kerek olacağı demektir. Eger böyle qarar alınmasa, belki de başqa yollar tapılacaq. Belki de büyük suv boruları olacaq. Ep bir Dnipro suvu Qırımğa berilmelidir ve berilecek, çünki Qırım onsuz yaşap olmaz", - dep qayd etti o.
İyünniñ 6-nda saba Rusiye Herson vilâyetinde Kahovka suv elektrik stantsiyasını patlattı, dep bildirdi Ukrayina arbiyleri.
Ukrayına prezidenti ofisiniñ yolbaşçısı Andriy Yermak Kahovka Kahovka suv elektrik stantsiyası bentiniñ bozuluvı Qırımnı içilgen suvsız qaldıra bile, dep bildirdi. Mesleatçısı Mıhaylo Podolâk patlatuvnı Rusiye Silâlı quvetleriniñ 205-inci motor atıcı brigadası yaptı, dep tahmin etti.
Ukrayina milliy telükesizlik ve mudafaa şurasınıñ kâtibi Oleksiy Danılov Kahovka Kahovka suv elektrik stantsiyasınıñ patlatıluvı «Rusiye istilâsınıñ yañı basamağı» ola, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.