Qırımtatar halqınıñ Milliy Meclisi temsiliy organnıñ uquq statusınıñ tasdıqlanması içün Ukrayina etnosiyaset ve vicdan azatlığı Devlet hızmetine vesiqalar bergen. Bunı Qırımtatar Resurs merkeziniñ yobaşçısı Eskender Bariyev haber etti.
"Niayet, 32 yıl içinde Qırımtatar halqınıñ Milliy Meclisi qırımtatar halqınıñ temsiliy organı kibi Ukrayina uquq alanında yer alacaq.
Meclis 1991 senesinden qırımtatar halqınıñ de-fakto temsil organıdır. Böyle statusnıñ berilmesine de-yure Ukrayina qanunları imkân bermey edi. Amma 1999 senesi Leonid Kuçma Ukrayina prezidenti yanında sırf Milliy Meclis azalarından ibaret olğan Qırımtatar halqınıñ Temsilciler Şurasını teşkil etken edi.
Ukrayinada resmiy uquq statusı olmağan Milliy Meclis BMT Baş Assambleyası ve Avropada işbirlik ve telükesizlik teşkilâtı kibi bir çoq halqara teşkilâtlarnıñ vesiqalarında Qırımtatarlarnıñ temsiliy organı kibi añıla edi.
Meclisniñ statusı qanun seviyesinde qayd etilgen soñ, onıñ qırımtatarlarnıñ aq ve menfaatlarına ait olğan devlet ve regional programmalarnıñ azırlanılmasına ve ömürge keçirilmesinde iştirak etmege imkânı olacaq. Bundan ğayrı, Qırımğa qaytqan tamır halqlarınıñ temsilcilerine topraq berilüvi meselesinde temsiliy organ ile fikir tanışmaq kerek olacaq. Ukrayinada tasil ceryanlarına qırımatatar tili, tarihı ve medeniyeti aqqında malümatnıñ kirsetilüv tertibi de Milliy Meclis ile işbirlikte belgilenmek kerek olacaq.
Qanun ayrıca tamır halqlarnıñ öz mediasını qurma aqqını da qayd etti. Aynı zamanda bu medianıñ yarısından ziyadesi temsiliy organğa ait olsa, o devletten maliyeviy destek ala bile.
Status resmiy olaraq tanılğan soñ Meclisniñ faaliyeti para Ukrayina devlet bücetinden ayırılacaq.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.