Qırımtatar Milliy Meclisiniñ reisi Refat Çubarov, Ukraina Tış işler nazirligi, işğal etilgen Qırımnıñ Rusiye nazirleriniñ yaqında Birleşken Arap Emirliklerine kerçekleştirgen ziyaretine cevap berir, dep bekley. O, Moskvanıñ Qırım yarımadasınıñ ilhaqını qanuniyleştirüv ıntıluvlarına qarşı Ukraina alacaq tedbirlerni eşitmege istey.
Çubarov, Qırımnıñ Rusiye memurları 2020 senesi fevralniñ soñunda İndistanğa barğanını da hatırlattı. Onıñ fikirince, «Moskvanıñ İndistan ve Birleşken Arap Emirlikleri ile munasebetlerinde faal ilerilevi Qırım ilhaqını qabul ettirip, çeşit halqara meydançıqlarda, hususan BMde öz neticelerini bere».
«Böylece, 2020 senesi dekabrniñ 18-nde, BM Baş Assambleyası «Qırım Muhtar Cumhuriyetinde ve Aqyar şeerinde insan aqları vaziyetinen» bağlı qararnı baqqanda İndistan eyyeti qarşı çıqtı, BAE eyyeti ise bitaraf qaldı. Ukraina Tış işler nazirliginden Rusiyeniñ vaqtınca işğal etilgen Qırımnıñ halqara tecrit etilüvini bozmaq ıntıluvlarına qarşı sistematik ve semereli areketler körermiz, der ümüt etem», – dep yazdı Çubarov Facebookta.
Rusiye kontrolindeki Qırım ükümeti, Qırımnıñ Rusiye baş nazir muavini İrina Kiviko ve Qırımnıñ iqtisadiy inkişaf naziri Dmitriy Şerâko Rusiye eyyeti erkânında Birleşken Arap Emirliklerine barıp keldi, dep bildirdi.
Berilgen malümatqa köre, Qırım memurları Birleşken Arap Emirliklerinde iş hususiyetlerini muzakere etti.
Bıltır Kiviko Rusiye eyyeti erkânında Kubağa barğan edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.