Qırımlılarnı Rusiye ordusında hızmet etmege mecbur etüv usulı olaraq cinaiy mesüliyetke çekmek ve işten boşatmaqnen qorquzalar, dep bildirdi Qırım Muhtar Cumhuriyeti prokuraturasınıñ bölük reberi Yegor Rebrov ZMINA neşirine.
Onıñ aytqanına köre, uquq qoruyıcılar yarımada sakinlerini Rusiye Silâlı quvetlerinde hızmet etmekten vazgeçkenleri içün memuriy ve cinaiy mesüliyetke çekken bir çoq adiselerni qayd etti.
"Bir şahısqa qarşı zorbalıq yapılğanı isbatlansa, bu şahısnı cinaiy mesüliyetke çekmemek içün sebep ola bile. Aynı zamanda Ukrayina qanunlarında böyle sebeplerniñ tam cedveli belgilenmegen", – dep bildirdi prokuror.
Aynı zamanda Rebrov añlattı ki, bu kibi meseleler er bir davada cinaiy işlerniñ bütün şaraitlerini köz ögüne alıp çezilmekte.
Prokuror hatırlattı ki, işğal etilgen Qırımda yaşağan, Rusiye Federatsiyası ve Belarus Silâlı quvetlerine mecburen celp etilgen ukrayinler öz isteginen esirlikke teslim ola ve Ukrayinada cinaiy mesüliyetten qurtula bile. Bunıñ içün olar cenk esirleri ile munasebetler boyunca koordinatsion ştabınıñ devlet leyhasına muracaat etmeli.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.