İlhaq etilgen Qırımda mayısnıñ 9-ında kütleviy tedbirler keçirilmeycek. bunı aprelniñ 28-inde Qırım parlamentiniñ rusiyeli başı Vladimir Konstantinov haber etti.
Dedi ki, Ğalebe kününde "Georgiy şeriti" aktsiyası keçirilecek.
"Kütleviy merasimler ötkerilmeyceginden sebep er pencerede ve bütün körüngen binalarda şerit asmaq. Evde cebe türkülerini yırlamaq, belki de nasıldır ğalebe paradını kösterirler...", - dedi Konstantinov.
Aksönov ise, Qırımda koronavirusnen bağlı ne tedbirler körülecegi Rusiye prezidenti Vladimir Putin ile muşavereden soñ aprelniñ 29-ında ilân etilecegini bildirdi.
Qırımda daa doquz adam koronavirusnen hastalandı. Böylece, şimdilik Qırımda 79 koronavirus adisesi tasdıqlandı. Olardan 20-si çetelden ketirildi, 10-u Rusiyeden ketirildi, 49 adise - yerli adiselerdir. Aqyarda umumen 36 COVID-19 hastası bar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.