Moskova şeer mahkemesi, iyül 11-inde Rusiye Yuqarı mahkemesi yanında keçirilgen aktsiya içün cöremelengen qırımtatarlarnıñ apellâtsiya şikâyetlerini baqmasını devam etti.
Bunı Qırım.Aqiqatqa advokat Konstantin Andreyev haber etti.
Onıñ aytqanına köre, sentâbr 18-inde apellatsiya mahkemesi, aktsiyanıñ 12 iştirakçisini cöremeletmek Moskovanıñ Meşçanskiy rayon mahkemesiniñ qararını amelde qaldırdı.
"Protokollarda, tutulğan adamlarnıñ ne transporantları, ne plakatları olmağanı ve adamlar sadece turıp öz grajdalıq noqta-i nazarını ifade etkeni belgilense de, imayeniñ delilleri mahkemeni qandırmadı. Demek, qarar evelden alınğandır. İleride kimse ıntılmasın dep, cezalamaq maqsadı qoyulğan edi", - aytıp berdi advokat.
O, mahkeme, qalğan 13 şikâyetni sentâbrniñ soñunda baqacaq olğanını qoştı.
"Qalğan 13 şikâyetniñ baqılması sentâbrniñ soñunda - oktâbrniñ başında olacaq. Biz bütün malümatnı toplaymız, ve zenaatdaşlarım, Avropa insan aqları mahkemesine şikâyet bermek içün endi çalışıp başladı", - añlattı Andreyev.
Moskovada iyülniñ 11-nde Rusiye politsiyası Bağçasaraydaki birinci «Hizb ut-Tahrir davasınıñ» mabüslerine qoltutmaq içün Rusiye Yuqarı mahkemesiniñ binasına kelgen 45 insannı tuttı. Faallerniñ qollarında yazuvlı şiarlar bar edi: «Qırımda milliy ve diniy sebeplerden repressiyalarnı toqtatıñız», «Qırımda «terrorizm» ile küreş – farqlı fikirlernen küreştir», «Bizim balalarımız terrorist degil» ve ilâhre.
Uquq qorçalayıcı Lutfiye Zudiyeva, Qırımda cezalanğan faalleriniñ cöremelerini ödemek içün «Qırım marafonı» cemaat teşebbüsi çerçivesinde para toplamağa başladılar, dep bildirgen edi.