Rusiye akimiyeti tarafından apske alınğan Qırımtatar faali Amet Suleymanovnıñ ömür arqadaşı Liliya Lümanova qocasınıñ sağlığı aqqında aytıp berdi. Bu haberni o, Oraqnıñ 21-de Vladimirskiy tsentral apshanesinde uzun bir ziyaret vaqtında bildi. Oıñnen beraber Ametniñ kiçik qardaşı ve eki oğlu İbraim ve Seit-Osman keldiler, dep haber ete Qırımtatar resurs merkezi.
Liliya Lümanovanıñ aytqanına köre, Ametniñ üç yıl devamında babasını körmegen kiçik oğlu Seit-Osmannen körüşüvi pek tesirli olğan.
Qadın aqayınıñ sağlığı fenalaşmağa devam etkenini ayttı:
"Ebet, biz Ametniñ sağlığı aqqında da laf ettik. O, özüni baqmağa tırışa, ilâclarını vaqtında içe. Amma onıñ problemleri yoq olmadı: qan basımı yüksek, baş aylanması, nefes tutuluv, yürek problemleri. Onıñ tiş problemleri de peyda olıp başladı".
Apiste olğan vaqıt devamında Amet yañı hobbin — resim yapuvnen oğraşmağa başladı.
"O, çoq resim yapa, oquy ve dünyanıñ çeşit köşelerinden kelgen mektüplerge cevap bere. Resim yapuv onı tınçlandıra ve raatlanmağa yardım ete, dey", — qayd etti Lümanova.
2021 senesi Rusiye mahkemesi Amet Suleymanovnı "Hizb ut-Tahrir davası" boyunca 12 yılğa üküm etti.
Suleymanov sağlıq vaziyeti sebebinden üç yıl ev apsinde edi. Jurnalistniñ arterial ve mitral yürek yetersizligi bar, yürek klapanı deñiştirilmeli.
2023 senesi çeçek ayınıñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
2024 senesi saban ayında Vladimirdeki Frunze rayon mahkemesi Amet Suleymanovnı apishaneden azat etmedi. Onıñ hastalıqları ise apiste tutulmasına mania ola. Suleymanov uquqçılarnen beraber mahkeme qararına istinaf şikâyetini berdi.
"Memorial" aq qorçalayıcı merkezi Amet Suleymanovnı siyasiy mabüs dep tanıdı.