12 yılğa mahküm etilgen qırımtatar aq qorçalayıcısı Emir-Usein Kuku, ayağında tiz çuqurında şişil sebebinden yürmekte zorlana, dep bildire "Qırım birdemligi" onıñ qadını Meryem Kukuğa atıf etip.
Şişikni qırımtatar bir qaç yıl evelsi, Rostov-na-Donu SİZO-sınıñ koloniyasına ketirilmezden evel tapqan edi. Soñra oña UZİ baqışını yaptırdılar, neticelerine köre, bu Beyker kistası olğanını tahmin ettiler.
O vaqıttan berli şişikniñ büyükligi arttı ve ağırmağa devam ete, dep qayd ete "Qırım birdemligi". Apishanede aq qorçalayıcı ekimler tarafından iç baqılmadı, tedaviylev de oña kösterilmedi, dep qayd etti Meryem Kuku
"Emir-Useinniñ tiz çuqurındaki şişigi sebebinden o, bazıda turıp olamay... Başqa iç bir yerde ve iç bir vaqıt teşkerüv ve tedaviylev yapılmadı. Antibiyotik ilâcını tedaviylev olaraq adlandırmaq mümkün degil", — dedi o.
Qırımlınıñ ağrıdan ğayrı, diger sağlıq problemleri de bar. Hususan, körüvi pek fenalaştı, yürek, büyrek ve bel ağrısı bar. Bundan ğayrı, aq qorçalayıcı yaqında anginağa oğradı. Ağır hastalıqtan sebep o, laf etip olamağan, pek öksürgen ve sıcağı köterilgen.
Emir-Usein Kuku – qırımtatar aq qorçalayıcısı ve faali. 2019 senesi boş aynıñ 12-nde Rusiyeniñ Cenübiy okrugınıñ arbiy mahkemesi onı "terror teşkilâtınıñ faaliyetini teşkil etkeninde" qabaatlap, 12 yılğa üküm etti. Amnesty International Kukunı vicdan mabüsi dep saya.
"Memorial" aq qorçalayıcı merkezi Emir-Usein Kukunı siyasiy mabüs dep tanıdı. 2020 senesi dekabr ayında onı Levko Lukyanenko Ukrayina devlet stipendiyasını alması içün namzet köstergenler.