Ukraina aq qorçalayıcıları Mariya Tomak Britaniya parlamentiniñ tış işler komitetiniñ azası Robert Sillige «Magnitskiy aktınıñ» kenişletilmesi içün Rusiye işğal etken Qırımda insan aqlarını bozğan rusiyeli ve ukrainalılarnıñ soyadları cedvelini berdi.
Bu aqta aq qorçalayıcılar ve Rusiyede tutulğan ukrainalı Pavlo Grıb ve Yevgen Panovnıñ soy-soplarınıñ Britaniya deputatı ile London körüşüvinde olğan Radio Svoboda mühbiri bildire.
«Bu insanlarğa qarşı «Magnitskiy aktınıñ» keniştilmesi mümkün olğanını tüşünemiz, çünki Avropa insan aqları konventsiyası bozula, laf azap aqqında kete», – dedi Tomak.
«Magnitskiy aktınıñ» qullanılması aqqında Robert Silli şöyle dedi: «Britaniya ükümetiniñ Skripalniñ zeerlenmesine ayırğan diqqatı Rusiye yapqan cinayetlerge semereli bir qarşılıq olğanını tüşünem».
Aq qorçalayıcılar Silli ile körüşmezden evel cedvelni Büyük Britaniyanıñ Tış işler nazirligine berdi. Şimdilik bu cedvel aydınlatılmay.
Körüşüvde Olga ve İgor Grıblar, Pavlo Grıbnıñ tatası ve babası, em de siyasiy mabüsler qorantalarınıñ birlik reberi ve «ukrainalı diversantlar» davasınıñ mabüsi Yevgen Panovnıñ qardaşı İgor Kotelânets bar ediler. Onıñ qayd etkenine köre, Büyük Britaniya kibi memleketlerniñ beyanatları Rusiye apishanelerinde tutulğan Ukraina vatandaşlarına qarşı azaplarnı toqtatmağa yardım ete.
«Bugün Tış işler nazirliginiñ vekillerinen körüşip, bütün ukrainalı siyasiy mabüsler aqqında hatırlatmağa istedik. Oleg Sentsov bunıñ içün açlıq tuttı – yalıñız özüne degil, qanunsız mahküm etilgen diger insanlarğa da diqqat celp etmege istedi», – dedi Kotelânets.
Robert Silli – Britaniya parlamentiniñ cemiyetler palatasınıñ Konservativ firqasınıñ azası, tış işler komitetiniñ iştirakçisidir. O, Rusiye prezidenti Vladimir Putinni tenqit etip, Rusiyege qarşı sanktsiyalarnıñ tarafdarı oldı. «Kirli Rusiye parasınen» küreşmek içün ise «Magnitskiy aktınıñ» qullanılmasına qoltuta.
«Magnitskiy aktı» – ABD ve bir sıra diger memleketlerniñ qanunı, o, insan aqlarını bozğan şahıslarnıñ kirişini yasaq ete ve iqtisadiy sanktsiyalar kirsete. Bu sene mayıs ayında qanunnı Büyük Britaniya parlamenti tasdıqlağan edi.