Rusiye uquq qoruyıcıları Aqmescit rayonınıñ Terek Eli (Trehprudnoye) köyünde yaşağan 21 yaşında qırımtatarı Lutfiye Veliyevanı tuttı. Bu aqta «Qırım birdemligi» cemaat birleşmesi haber ete.
Advokat Edem Semedlâyevniñ bildirgenine köre, saba qorantanı üç mikroavtobusnen kelgen avtomatlı OMON hadimleri uyandırdı. Qıznıñ bir şeyi alınmadı, amma cep telefonını qıdırğanlar. Tintüv vaqtında tapamağanlar.
«FSB binasına kelip yetiştirdim, olar da kelgenler. O ve babasınen laf etip oldım, amma bir on saniye. FSB hadimi meni binağa almayıp, advokat şimdilik kerekmey dedi. Men itiraz bildirdim – müvekkillerim uquqiy yardımğa ihtiyacları bar olğanını tüşüne. O, «Daa yüksek organlarğa muracaat etip, şikâyet yazıñız. İstegeniñizni yapıñız – kirsetmeyim» dedi», – dep qayd etti Semedlâyev.
Advokatnıñ tarif etkenine köre, evlerinde daa evel de tintüv keçirilgen edi, amma Ekstremizm ile küreş merkeziniñ Rusiye polis hadimleri keçirgen edi.
«Bir kün evelsi, oktâbrniñ 10-nda, «E» Merkezinden kelgen ediler... Teşkerüv çerçivesinde kelgenler – «Vkontakte» içtimaiy ağında Rusiye Federatsiyasınıñ silâlı quvetlerini itibardan tüşürgen eken. Memuriy ya da cinaiy dava açıldımı daa bilmeyip, amma artqan Qırımda qadınlarnıñ taqip etilüvi qasevetlendire», – dep qoştı advokat.
Aq qorçalayıcılarnıñ malümatına köre, Qırımda 186 siyasiy taqip qurbanından 110-u qırımtatarı ola, Rusiye uquq qoruyıcıları keçirgen tintüvlerniñ 75%-ı qırımtatarlarnıñ evlerinde ola.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.