Londondaki Ukraina elçiligi, Reuters malümat agentligi yarımadadaki kostüm bal aqqında Twitterde video yayınlağan soñ, Rusiye tarafından Qırımnıñ işğal etilüvi aqqında hatırlattı.
Reuters tarafından yayınlanğan videoda müellifi aqqında iç bir şey yoq. Yalıñız Aqyarnıñ bölgelerinden birinde yerleşken Ternovka köyünde yapılğanı kösterilgen, dep yaza Azatlıq Radiosı.
«Ürmetli Reuters, adıñız Rusiye propagandası üzerinde yahşı körünmey. Qırım – bu Ukraina, ve [o] bundan evel olğan «baar kötüm balı» vaqtında belli Rusiye «yeşil adamçıları» tarafından qanunsız işğal etilgen edi», – dep bildirdi Ukraina elçiligi.
Dear @Reuters, your name does not look good on #Russian #propaganda.#CrimeaIsUkraine 🇺🇦 and was illegally occupied in an earlier ‘spring costumed ball%27 of the infamous 🇷🇺 %27green men’.#StopRussianAggression#Reuters#StopRussianPropaganda https://t.co/vPtZK6sUKd
— Ukraine%27s Emb. to UK (@UkrEmbLondon) April 27, 2021
Reuters malümat agentligi Ukraina elçiliginiñ bildirüvini şimdlik daa açıq tefsir etmedi.
Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.