Lilâ Bucurova: Apiske alınğan qırımtatarlarnıñ balaları – bizim balalarımızdır

Qırımda «delili» kitaplar olğan (olar da, gizliden qoyulğan, dep aytalar) terrorizmden şübheli sayılğan insanlarnıñ evlerinde keçirilgen tintüvler ve olarnıñ tutulması çağına yetmegen daa 12 balanı babasız qaldırdı. Daa doğrusı, 15. Süyür Taş (Belokamennoye) köyünde yaşağan Seyran Hayretdinov – üç balanıñ babası – ana-babası saqat olğanı içün balanı baqıp olamağan daa bir balanıñ vasiyi ola. Bavurçı (Kamenka) qasabasında yaşağan Vadim Bektemirovnıñ eki qızı bar, amma tezden daa bir balası dünyağa kelecek. Böylece, «Bizim balalar» cemaat teşebbüsiniñ vasiyligi altında babaları apiske alınğan qırımtatar musulman qorantalarından 185 bala buluna.

Bilem, aramızda böyle şeyler aytqanlar da bar: meni meraqlandırmay, çünki bu balalarnıñ ana-babalarınıñ diniy baqışlarınen men razı degilim. Amma qırımtatarlarnıñ ekseriyeti añlay: ana-babasınıñ qabaatı barmı-yoqmı, olarnıñ baqışlarına qol tutamızmı-yoqmı, müim degil. Müimi olğan – yetim qalğan balalar.

Babaları, diqqatı ve qazanğan paraları olmasa, nasıl yaşaylar, tasavvur etip olasıñızmı? Ne aşaylar, ne kiyeler, mektep aletleri ve oyuncaqları barmı? Bala hastalansa, anasınıñ ilâc alacaq parası barmı? Bu suallerniñ cevabı belli. Belli ki, qırımtatar balalarından iç kimseniñ aç qalmasına izin bermeymiz Sürgünlik yıllarında elâk olğan ve ğayıp olğan biñlernen balası içün ağlağan halqımıznıñ ananelerinde böyle şeyler yoq.

Babasız qalğan 185 baladan er biri – bizim balamızdır. Balalarıñıznı baqqanda yanlarında babası olmağan, biz yardım etmesek, destek alıp olamaycaqlar aqqında hatırlañız.

Yaşağan zor zamanımızda merametli olğan er kesten Allah razı olsun.

Lilâ Bucurova, jurnalist, QaraDeniz production baş müdiriniñ muavini

«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün

(Lilâ Bucurovanıñ Facebook saifesinden alınğan)