Rusiyede Arhangelskniñ İsagorskiy mahkemesi qara ciger qanseri hastalığı olğan ve mahsus tibbiy müessisede tedaviylenmesine ihtiyacı olğan Lenur Halilovnı azat etmege razı olmadı. Bu aqta Qırımdaki vaziyet ve qırımtatarlarnıñ taqip etilüvini aydınlatqan Ukrayinalı jurnalist Anton Naumlük bildirdi.
Rusiye mahkemesi tarafından "qırımlı musulmanlar davası" boyunca mahküm etilgen "Aluşta" mustaqil musulman cemiyetiniñ sabıq yolbaşçısı Lenur Halilov özü zornen areket ete, berilgen tedaviylev ise hastalığınıñ ilerilemesini toqtatmay.
"… Ceza çekmesine mania olğan hastalıqlarnıñ cedvelinde olğan hastalıqnıñ olması Halilovnı apisten azat etmek içün şartsız bir sebep sayılmay". Ve özü areket ete bile ve özüni baqa bile, dep aytıla (delil olaraq videolar kösterildi)… Laf ete, er şey añlay ve aqlı yerinde". "Formal bir tedaviylev"… Mahkeme tsinizminiñ bu qadarını çoqtan körmedim", – dedi jurnalist.
Naumlük er adamnıñ hastalıqları bunen bitmey, dep ayttı. Rostov SİZOsında tişini çıqarğanda S gepatitini taşıdılar.
2019 senesi ilk yaz ayınıñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen "Hizb ut-Tahrir" islâm siyasiy firqasınen alâqaları bar dep qabaatladı.
2021 senesi arman ayınıñ 16-nda Cenübiy okrugınıñ arbiy mahkemesi "Aluştadaki Hizb ut-Tahrir gruppasınıñ" mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.