Rusiye mahkemesi tarafından mahküm etilgen "Aluşta" mustaqil musulman cemiyetiniñ sabıq reisi qanser hastalığı olğan Lenur Halilov eki aydan berli Rusiye Federatsiyası Arhangelsk vilâyetindeki Cezalarnı yerine ketirüv federal hızmeti idaresiniñ vilâyet hastahanesinde buluna. Bu aqta ömür arqadaşı Umida Hudoyberdiyeva "Qırım birdemligi" cemaat birleşmesine bildirdi.
Onıñ aytqanına köre, aqayı üç afta bağğa çıqmadı. Hudoyberdiyevanıñ qayd etkenine köre, telefon etüv arizaları uzun vaqıt qabul etilmegen edi. Lâkin yaqında Halilov apayınen laf etip oldı.
"Alı yoq, dep ayta, pek soluq. Daa bir hastahanege alıp ketmege isteyler, anda qanser ekimleri baqacaq. Tek ağrısını kesmek içün ilâc berile. Başqa bir şey yoq. Endi ara-sıra kolâskada otura, ayatı içün pek qasevetlenem", – dep tarif etti Umida Hudoyberdiyeva.
Aprelniñ ortasında qadın "Gosuslugi" Rusiye devlet hızmetinden haber aldı. Anda bu yıl aprelniñ 1-nde Rusiye Sağlıq nazirligi Lenur Halilovğa III derece saqatlığını berdi ve "imtiyazlı şekilde ilâclarnen temin etüv aqqını" berdi, dep aytıla. Onıñ aytqanına köre, Qırımlı alâ daa kerekli ilâclar alamay.
Lenur Halilov — Aluşta mustaqil musulman cemiyetiniñ sabıq yolbaşçısıdır.
2019 senesi ilk yaz ayınıñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen "Hizb ut-Tahrir" islâm siyasiy firqasınen alâqaları bar dep qabaatladı.
2021 senesi arman ayınıñ 16-nda Cenübiy okrugınıñ arbiy mahkemesi "Aluştadaki Hizb ut-Tahrir gruppasınıñ" mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.