İşğal etilgen Qırımda Rusiye akimiyeti Qırımlı tedqiqatçı, jurnalist ve tele alıp barıcısı Lenora Dülberni Rusiye Federatsiyası Memuriy uquq bozuvları kodeksiniñ 20.29 maddesine ("ekstremist malümatını azırlav ve tarqatuv") ve 20.3.3 maddesiniñ 1-inci qısmına istinaden ("Rusiye Federatsiyası silâlı quvetlerini itibardan tüşürüv") memuriy mesüliyetke çekti. Bu aqta Qırımtatar resurs merkezi haber ete.
QRM bildirgenine köre, Rusiye kontrolindeki Aqmescitniñ Kiyev rayon mahkemesi eki ükümni 2025 senesi dekabrniñ 4-nde (qadı Kaminina Valentina Frantsevna) çıqardı.
Birinci dava "Rusiye Federatsiyası Silâlı quvetlerini itibardan tüşürüvnen" bağlı eken, Rusiye akimiyeti Lenora Dülberniñ Qırım.Aqiqatnıñ YouTube kanalındaki "Qırım inciri" yarışınıñ canlı yayınında aytqanlarını qayd etti, onı Rusiye Federatsiyası Memuriy uquq bozuvları kodeksiniñ 20.3.3 maddesiniñ 1-inci qısmına istinaden qabaatlı tanıp, 30 biñ ruble para cezasını berdiler.
Ekinci dava "ekstremist malümatını" tarqatuvnen bağlı eken – Franko Qırım ilmiy kütüphanesinde tapılğan ve alınğan "Siyasiy saanıñ transformatsiyası şaraitlerinde qırımtatarlar" kitabınıñ müelliflerinden biri Lenora Dülber ola. 192 saifelik kitap kütüphanege mecburiy regional nusha olaraq keldi.
Taqipniñ sebebi "ekspert hulâsası" olğan, anda ilmiy işniñ metninde Rusiye Federatsiyası "ekstremist teşkilâtı olaraq tanığan" "Hizb ut-Tahrir" teşkilâtı ve Qırımtatar Milliy Meclisiniñ "faaliyetini aqlav sözleri" bar, dep aytıla.
Buña esaslanıp, Aqmescitniñ Kiyev rayon mahkemesi Lenora Dülberni Rusiye Federatsiyası Memuriy uquq bozuvları kodeksiniñ 20.29 maddesine istinaden ("ekstremist malümatını azırlav ve tarqatuv") qabaatlı tanıp, 3 biñ Rusiye rublesi miqdarında para cezasını berdi.
"Tribunal.Krımskiy epizod" Ukrayina aq qorçalayıcı telegram kanalı "kitap ilmiy iş olğanı içün ekstremist malümatını tarqatuv kibi bir qabaat zaten olamaz, bunı em Rusiye uquq qoruyıcıları, em qadılar yahşı bile", dep qayd etti. Aq qorçalayıcılarnıñ fikirince, "Lenora Dülberge qarşı areketlerniñ mefküreviy baqışlarğa köre şahıslarnı taqip etüv alâmetleri bar".
Lenora Dülber – siyasetşınas, içtimaiyatçı, jurnalist ve qırımtatar faali. "Merkez" yayınınıñ alıp barıcısı, "Siyasiy saadaki transformatsiya şaraitlerinde qırımtatarlar" içtimaiy tedqiqatınıñ müelliflerinden biri ola.