Sudaqta Rusiye uquq qoruyıcıları qırımlı jurnalist ve siyasetşınas Lenora Dülberniñ evinde dekabrniñ 4-nde saba tintüv keçirgen soñ onı Aqmescitke alıp ketti. Bu aqta qırımlı aq qorçalayıcı Lutfiye Zudiyeva, Qırımtatar Milliy Meclisiniñ reisi Refat Çubarov ve "Qırım birdemligi" cemaat birleşmesi bildireler.
Zudiyevanıñ malümatına köre, tintüv Rusiye kontrolindeki Aqmescitniñ Kiyev rayon mahkemesiniñ qararınen keçirildi.
Refat Çubarov Dülber Aqmescitteki Rusiyeniñ Qırım ve Aqyar FSB idaresine alıp ketirildi, dep qoştı. Onıñ fikirince, Rusiye uquq qoruyıcılarınıñ böyle areketleri "qırımtatar halqına qarşı repressiya ve basqı quvetleşkenini" köstere.
"İşğal etilgen Qırımda daa bir sürip kirüv ve tintüv, bu sefer belli tedqiqatçı ve jurnalistke qarşı, qırımtatar halqınıñ iradesini bastırmaq ve tuvğan Qırımından çıqmağa mecbur etmek içün yapılğan repressiya ve basqılarnıñ quvetleşkenini köstere", – dep yazdı Çubarov.
"Qırım birdemligi" haber etkenine köre, tahminen 20 silâlı insan iştirak etken tintüv vaqtında Rusiye uquq qoruyıcılarınıñ diqqatını Lenora Dülberniñ ilmiy işleri celp etti. Olar cep telefonını ve bilgisayarını da aldı.
Tintüv sebebi ve Dülberniñ ne içün tutulğanı aydınlatılmay. Rusiye uquq qoruyıcılarınıñ resmiy izaatları şimdilik yoq.
Lenora Dülber – siyasetşınas, içtimaiyatçı, jurnalist ve qırımtatar faali. "Merkez" yayınınıñ alıp barıcısı, "Siyasiy saadaki transformatsiya şaraitlerinde qırımtatarlar" içtimaiy tedqiqatınıñ müelliflerinden biri ola.