Rusiye Tış işler naziri Sergey Lavrov kene işğal etilgen Qırım Rusiye terkibinde qalacaq, dep bildirdi. O, Ukraina akimiyeti «bunı çoqtan añlap qabul etkeninden» emin.
Bu aqta o, milliy-medeniy birleşmelerniñ vekillerinen körüşip ayttı.
«Qırım – çezilgen bir mesele, çoqtan er şeyni añlattıq, er şey añladılar, eminim, Ukraina reberleri de añladı», – dep bildire Lavrovnıñ aytqanlarını «RİA Novosti Krım».
Lavrov bunı Devlet Dumasınıñ saylavları ögünde ve Kyivniñ Qırım ve Donbas sakinleriniñ rey berüvge celp etilgenine açuvlanğanı munasebetinen ayttı.
«Bir çoq provokatsiya şimdi Ukrainadan yapılğanını bilem. Olar (Kyiv akimiyeti – QA) memleketlerge talaplarını yollağanını bilem, elçiler ükümet memurlarına barıp, saylavlarımızğa közeticilerni yollamasınlar dep israr etmelerini isteyler», – dedi Lavrov.
O, Rusiye pasportı olğan Donbas sakinleri «yaşağan yerlerine baqmadan rey bere bile», dep qoştı.
Ukraina akimiyeti Lavrovnıñ bu aytqanlarına şimdilik cevap bermedi.
Kreml, Rusiye 2014 senesi işğal etken Qırımnıñ topraq mensüpligi meselesi muzakere etilmeycek, dep bildirgen edi. 2014 senesi AB ve ABD Qırım işğali sebebinden Rusiyege qarşı sanktsiyalar kirsetti.
İyül ayında Rusiye prezidentiniñ matbuat kâtibi Dmitriy Peskov Qırım bir vaqıt «kelişme mevzusı olmaycaq», dep ayttı.
Ukraina Tış işler naziri Dmıtro Kuleba «Ukraina Rusiyeni Qırımdan çıqaracaq», «Qırım platforması» ise buña yardım etecek, dep qayd aytqan edi.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.