Kıyiv şeeriniñ arbiy memuriyetiniñ yolbaşçısı Timur Tkaçenko: "Rusiye ücüminde elâk olğanlarnıñ sayısı 8-ge arttı. Düşman kene mesken yerlerge ücüm etip, sakinlerni öldüre. Bayağı ciddiy zarar kördik ve bir çoq insan, şu cümleden balalar zarar kördi", — dep bildirdi.
Tkaçenko vaziyetni pek dinamik dep adlandırdı. Daa evel o, üç ölü ve 25 yaralı aqqında haber etken edi.
Şeer başı Vitaliy Kliçko beş ölü ve 34 yaralanğan aqqında bildirdi.
"32 adamnı ekimler hastahanege qoydılar. Eki adamğa anda yardım etildi", — dep qoştı şeer başı.
Saba saat 7-lerde Kıyiv şeer başı 10 ölü aqqında bildirdi.
Kliçko, hususan, Darnıtsâdaki doquz qatlı evniñ birinci qatından altıncı qatına qadar yıqılğanını bildirdi.
"Esasen bu mesken qurucılığı ve grajdan infrastruktura obyektleridir. Rusiyeliler terroristler", — dep izaatladı Tkaçenko.
İç işler nazirligi Kıyivniñ altı rayonı zarar körgenini bildire.
Müessisede qoştılar ki, aqibetleri aqqında malümat daa alına.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.