Kıyivde rus ücümi neticesinde bir adam elâk oldı, parçalar ise Aziz Volodımır kilsesine ve çet memleketiniñ elçiligine zarar ketirdi

Tasviriy resim

Kıyivde Rusiye ücüminiñ neticesinde bir insan elâk oldı, daa beş kişi yaralandı, dep bildirdi şeer başı Vitaliy Kliçko.

Onıñ malümatına köre, bir kişi Podol rayonında elâk oldı, dört yaralanğan kişi hastahanege alındı.

Klitçko şunı da bildirdi ki, Şevçenko rayonında parçalar açıq yerge tüşken, anda 10-dan ziyade avtomobil, Aziz Volodımır kilsesi ve çet memleketiniñ elçiligi zarar körgen.

Bundan evel yerli akimiyet BPLA parçaları Şevçenko rayonında, paytahtnıñ merkezine açıq yerge ve sekiz qatlı binanıñ damına tüşkenini bildirdi. Bundan ğayrı, Podoldaki mesken binanıñ dairelerinde yanğın çıqqan, Obolon rayonında yol üstünde parçalar yana edi.

Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.

Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.

İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.

Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.