Oraq ayınıñ 9-nda Kıyivde Rusiye Federatsiyasında mahküm etilgen qırımtatar vatandaş jurnalisti Osman Arifmetovnıñ “Menim sürgünligim” adlı reportajlar kitabınıñ taqdim merasimi olıp keçti, dep haber ete Qırım.Aqiqat mühbiri.
Taqdim etüv oraq ayınıñ 9-nda saat 18:00-de “Sens” kitap tükânında (Kıyiv, Hreşçatık 34) olıp ke.ti.
Taqdim merasimi
Tedbir devamında çıqışta bulunğanlar:
- Oleksandra Yefimenko — ukrayin jurnalisti, 2017 senesinden 2021 senesine qadar Qırımda çalıştı, insan aqlarınıñ bozuluvı mevzusınen oğraştı.
- Mariya Ğorbaç — edebiy muarrir ve terciman, jurnalist ve maarifçi.
- Tetâna Peçonçik — ZMINA insan aqları merkeziniñ idare reisi.
- Radek Pek — Çeh Cumhuriyetiniñ Ukrayinadaki Fevqulâde ve vekâletli elçisi.
Kitapnıñ taqdimi
Quralaynıñ soñunda bu kitapnıñ neşir etilgeni aqqında ZMINA insan aqları merkeziniñ yolbaşçısı Tetâna Peçonçik bildirgen edi:
“Kitap qırımtatar vatandaş jurnalistiniñ Aqmescitten Minusinkke qadar çeşit tahqiqat izolâtorları ve apishanelerinde yazğan reportajlarından ibaret. Olarda müellif apishanede yaşayışnıñ kerçeklerini, mabüslerniñ taqip etilüvini ve Rusiye mahkeme sistemasında sahtelevlerni tafsilâtlıca tarif ete.Onıñ başına kelgen kergin şaraitlerge baqmadan, Osman imanını, sağlıq mantığını ve ince istizanı saqlap qala, onıñ yazıları ise ümüt ve halqınıñ taqdiri içün yañı küreşke azırlıqnen tolu”, - dep yazğan edi Peçonçik Facebook saifesinde.
2019 senesi saban ayında Rusiye quvetçileri Qırımda qırımtatar faalleriniñ, hususan "Qırım birdemligi" cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi saban ayınıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
"Memorial" aq qorçalayıcı merkezi 2019 senesi saban ayınıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
2022 senesi boş aynıñ 24-nde Rostov-na-Donudaki Cenübiy arbiy okrugınıñ mahkemesi mabüslerni terror faaliyetinde ve akimiyet zapt etmege tırışqanlarında qabaatladı. Faaller Enver Ametov ve Yaşar Muyedinov 13 yıl sert rejimli koloniyada, vatandaş jurnalistleri Ruslan Suleymanov, Rustem Şeyhaliyev ve Osman Arifmemetov 14 yıl koloniyada qalmasına üküm etildi. Mabüsler 4 yılnı apishanede keçirecek, soñra daa 1 yılğa areket serbestligi sıñırlanacaq. Mabüsler özüni qabaatlı olaraq tanımayıp, siyasiy taqip olğanını tüşüneler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.