Ukrayina Silâlı quvetleriniñ baş komandanı OAleksandr Sırskıy The Guardian gazetasına bergen intervyüsında işğal etilgen yarımadanı Rusiye ile bağlağan Keriç köprüniñ yoq etilüv müddetini aytmadı, amma Kıyiv Qırımnı qaytarmaqnı planlaştıra, dep qayd etti.
"Bu kerçek. Elbette, bu büyük arbiy sırdır. Biz 1991 senesiniñ sıñırlarına çıqmaq içün elimizden kelgenini yapacaqmız", — dedi ukrayin generalı.
O şunı da hatırlattı ki, deñiz uçaqları Rusiyeniñ Qara deñiz arbiy-deñiz flotunıñ üçte birini batırdı.
"Olar içün bu, kerçekten de, bir tuzaq oldı, bazıları içün ise - mezar", — dedi Sırskıy.
Onıñ aytqanına köre, Kreml, bir sıra ukrayin ücümlerinden soñ, Aqyar limanından bütünley çıqmağa mecbur oldı.
Bundan da ğayrı, o, ukrayin arbiyleri Rusiyede "200-ge yaqın kritik infrastruktura obyektine" uzun mesafeli kamikadze uçaqlarınıñ yardımınen urdı, dep bildirdi.
Sırskiyniñ aytqanına köre, bu obyektlerniñ episi arbiy logistika ile bağlı edi ve zavodlar, yaqıt ve silâ anbarlarını qaplap ala edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.