Qırımda apiske alınğan advokat Emil Kurbedinovdan alınğan tehnik on künden soñ qaytarılacaq. Şu sebepten kelecek afta olacaq mahkeme esnaslarında semereli imayeni teşkil etemez. Bu aqta uquqçı Elvina Semedlâyeva jurnalist Anton Naumlükke dedi.
Onıñ aytqanına köre, mahkemeniñ tehnikanı qaytarmaq qararına baqmadan, bu qarar işke tüşürilgen soñ, yani on künden soñ olacaq.
«Memuriy dava qararında aytıla ki, Kurbedinovnıñ memuriy cezası belgilendi ve tutılğanda alınğan bütün tehnikası keri qaytarılmalı: cep telefonı, bilgisayar ve malümat taşıyıcısı. Anda iştirak etken bütün cinaiy davalarnıñ malümatı bar, içinde advokat sırı olğan malümat da mevcut. Kelecek afta bu davalarnıñ mahkemeleri olacaq. Amma o, tek dört künden soñ azatlıqqa çıqacaq. Bu taşıyıcılarnıñ malümatına irişip olamay, yani oturışuvlarğa azırlanmaq qıyın olacaq. Misal olaraq, Bağçasaraydaki gruppanıñ («Hizb ut-Tahrir davası» – QA) munaqaşaları olacaq, amma semereli bir imaye azırlamaq mümkün degil», – dedi Semedlâyeva.
Qırım Yuqarı mahkemesi Kurbedinovnıñ apiske alınmasınen bağlı itiraz arizasını yarın baqacaq. Faqat 13 uquqçı ve advokattan ibaret imaye Aqmescitniñ Kiyev rayon mahkemesi çıqarğan qarar deñiştirileceginden şübelene.
Kreml kontrolindeki Aqmescitniñ Kiyev rayon mahkemesi dekabrniñ 7-nde qırımlı advokat Emil Kurbedinovnı 5 künge tevqif etti.
Your browser doesn’t support HTML5
Emil Kürbedinov 5 künge tevqif etildi (video)
Qararnı qadı Anton Tsıkurenko seslendirdi. Kurbedinov 2013 senesi Facebookta paylaşqanları içün Rusiye Memuriy cinayetler kodeksiniñ 20.3 maddesi boyunca (natsist işaretleri ya da timsalleri, ekstremist teşkilâtlarnıñ işaretleri ya da timsalleri, ya da federal qanunlarnen yasaqlanğan işaret ve timsalleriniñ teşviqatı ve açıq numayış etilmesi) apiske alındı. Kurbedinovnıñ zenaatdaşları dey ki, onı Dimaşqqa köçken Qırım sakini şikâyet etti.
Kurbedinovnıñ fikirince, onıñ dekabrniñ 6-nda Rusiye uquq qoruyıcıları tarafından tutulması «olmaycaq sebeplerden» yapıldı, o, ekstremizm qabaatlarını tanımay. Emil Kurbedinov qayd etkenine köre, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.
Emil Kurbedinovnıñ advokatı Aleksey Ladin Aqmescitniñ Kiyev rayon mahkemesinde çıqışta bulunıp, cinayet olmağanı içün dava qapatılmalı, dedi. Ladin 2013 senesi Qırımda «Ukraina uquqı bar edi, oña köre bu timsaller yasaq altında degil. Cinayet işlemek kibi bir niyet de yoq edi», dep hatırlattı. Mahkeme adise eski olğanına baqmadan, memuriy davanı qapatmaq muracaatını red etti.
Your browser doesn’t support HTML5
12 imayeci ve altı saat mahkeme: Kürbedinovnıñ davası nasıl baqıldı (video)
Emil Kurbedinovnıñ davasında şaatlardan biri Rusiye FSB hadimi Andrey Suşko ola. O, qırımtatar faali Renat Paralamovnıñ hırsızlanması ve azaplanmasında iştirak etken edi.
Keçenleri Suşko Paralamovnı hırsızlağanında şeklenip, ABD sanktsiyalar cedveline kirsetilgen edi.
Dekabrniñ 7-nde Ukraina Tış işler nazirligi işğal etilgen Qırımda Rusiye mahkemesi tarafından advokat Emil Kurbedinovnıñ apiske alınmasına qarşı narazılıq bildirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.