KrımSOS cemaat teşkilâtı ARTIF Tiflis platformasınen beraber qırımlı siyasiy mabüslerge qol tutmaq içün sanat obyektini yapa. Ukrayın evi yanındaki yerastı keçitinde resim yapıla. Sanat obyektine «Yerastı çıqmaz soqaq» adı berildi.
«Kyivniñ merkezinde yerastı keçit sanat obyektine çevirilecek. Gürci ressamı David Kuhalaşvili divarlarnı resimlernen yaraştırıp, apishane koridorı müitini yarata. Er bir qapunıñ artında Kremlniñ siyasiy mabüslerinden biriniñ ikâyesi saqlanacaq. Bu faal vatandaş fikirleri ya da diniy baqışları içün mahküm etilgen ve taqip etilgen 98 qırımlı», – dep haber etile KrımSOS saytında.
Derc etilgen malümatqa köre, «Yerastı çıqmaz soqaq» sanat obyekti fevralniñ 8-nde taqdim etilecek.
Advokat Nikolay Polozovnıñ Qırım.Aqiqatqa bildirgenine köre, Rusiyede ve işğal etilgen Qırımda apiske alınğan Ukraina vatandaşlarınıñ advokatları ve soy-sopları olarnı azat etüv esnasında bir netice körmey. Polozov, al-azırda 130-dan çoq Ukraina vatandaşı Rusiyede ya da Qırımda tutula.
2020 senesi oktâbr ayında Kyivde «Er birini hatırlat» aktsiyası olıp keçti. Onıñ iştirakçileri akimiyetke Rusiye apishanelerinde yatqan ukrainalı mabüsler aqqında hatırlattı.
Tutulğan şahıslarnı deñişüv soñki sefer 2020 senesi aprelniñ 16-nda kerçekleşti: ismen anda Ukraina ve «DNR» ve «LNR» gruppirovkalarınıñ reberleri iştirak etti. Rusiye tarafdarı aydutlar 20 insannı azat etip, Kyivne teslim etti. Birinci ve soñki sefer qırımlılar Rusiye ve Ukraina arasındaki deñişüvde 2019 senesi sentâbr ayında iştirak etti, o vaqıt Oleg Sentsov, Edem Bekirov ve Kremlniñ diger siyasiy mabüsleri azatlıqqa çıqtı.
Al-azırda Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppasınıñ malümatına köre, 2020 senesi Qırımda siyasiy ya da diniy sebeplerden 24 insan mahküm etildi.