Kyivniñ «Borıspil» ava limanında avgustnıñ 4-nde Tokiodaki Olimpiadadan qaytqan qırımlı ukrain küreşçisi Lenur Temirovnı qarşıladılar. Bu aqta Qırım.Aqiqat mühbiri haber ete.
Sportçı avgustnıñ 4-nde Olimpiada finalında yunan-roma küreşinde altın medaller içün küreşecek ukrainalı küreşçi Jan Belenük ve Parviz Nasibovğa muvafaqiyetler tiledi. Temirov, eki sportçı «altın» qazana bile, dep qayd etti.
Avgustnıñ 2-nde Lenur Temirov Olimpiadanıñ yunan-roma küreşinde (60 kiloğa qadar) ğalebe qazanamayıp, tunç medal alamadı. Qıtaylı sportçı Saylike Vaylihan ğalip çıqtı.
Tokiodaki Olimpiada oyunları avgustnıñ 8-ne qadar devam etecek. Ukraina cıyma taqımı 7 medal qazandı, 6-sı tunç ve 1 danesi kümüş.
2020 senesi Lenur Temirov Romada keçirilgen Avropa yunan-roma küreşi çempionatınıñ tunç ğalibi oldı.