Kyivde yanvarniñ 16-nda yarımada işğaline bağışlanğan «Qırım işğaliniñ beş yılı: tahmin, kerçek, çağıruvlar» konferentsiyası başladı, dep bildire Qırım.Aqiqat mühbiri.
«Bu salonda bulunğan spikerlerniñ ekseriyeti – 2014 senesi fevral-mart aylarında olıp keçken adise-vaqialarnıñ şaatları ve Qırım tirenüviniñ iştirakçileridir… Qırım pek tez zapt etilgenine baqmadan, Qırımnıñ Rusiye terkibindeki «keleceginen» bağlı ayrı tahminler yapılğan edi. Bizim konferentsiyamız – bu tahminlerni bugünki künde leyhağa toplamaq ıntıluvıdır. Olar kerçek oldımı?», – dep ayttı kiriş sözünde Ukraina gençlik ve sport naziriniñ mesleatçısı Gayana Yüksel.
Tedbir vaqtında üç panelniñ keçirilmesi planlaştırıla: «Qırım yarımadasınıñ askeriyleştirilüvi ve işğalden qurtuluv istiqballeri», «Qırım qanunsızlıq alanı olaraq: yarımada işğaliniñ uquqiy aqibetleri» ve «Qırımnıñ unikal medeniy mirasınıñ saqlap qaluvı ve işğal şaraitlerindeki tasil meseleleri».
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.