Ukrainada «Qırım platformasınıñ» ekspert ağı şekillendirildi ve forumınıñ keçirilüvi planlaştırıla. Kyivde iyünniñ 7-nde ekspert ağı taqdim etile ve böyle malümat berile:
- «Qırım platforması» nedir ve ekspert ağınıñ rolü ne;
- «Qırım platforması» ekspert ağınıñ teşebbüs gruppası bugün nenen oğraşa;
- «Qırım platforması» ekspert ağınıñ memorandumı nedir, onıñ esas maddeleri, ağ faaliyetiniñ yönelişleri;
- ekspert ağınıñ forumı nedir, ne vaqıt keçirilecek, neler muzakere etilecek ve nasıl qararlar qabul etilecek;
- ağnıñ Ukraina qısmınıñ çetel ekspertlerinen, Ukraina ve çetel ükümet qurulışları, halqara teşkilâtlarnen işbirligi.
Taqdim merasimini Gennadiy Maksak – Ukraina Prizmasınıñ icra müdiri, Olga Skripnik – Qırım aq qorçalayıcı gruppasınıñ reisi, Valentina Samar – Jurnalist tedqiqatları merkeziniñ baş muarriri keçireler.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.