Kyivdeki Halqara munasebetler institutınıñ binasında aprelniñ 18-nde «Kremlniñ mabüsleri» sergisi açıldı. Sergide Rusiye akimiyeti tutqan ve mahküm etken ukrain ve qırımtatarlarnıñ fotoresimleri ve tercimeiyalları numayış etildi.
Açılış merasiminde qırımtatar halqınıñ lideri, Ukraina halq deputatı Mustafa Cemilev ve Ukraina haber siyaseti naziriniñ birinci muavini Emine Ceppar iştirak ettiler, dep bildire Qırım.Aqiqat mühbiri.
Mustafa Cemilev ve Emine Ceppar «Kremlniñ mabüsleri» sergisinde
Cemilev «Kremlniñ mabüsleri» ekspozitsiyası insanlarğa siyasiy mabüslerniñ taqdirlerini hatırlatmalı, dep qayd etti.
«Mında apiste bulunğan insanlarnıñ, Kreml mabüsleriniñ fotosüretleri taqdim etildi. Bu insanlar areketsizlik, haos, hainlik şaraitlerinde işğalcilerge tirenmek içün cesaret taptı. Olarnıñ azat etilüvi içün elimizden kelgenini yapmaq bizim borcumızdır», – dep ayttı o.
Emine Ceppar ise Ukrainada ve dünyanıñ diger memleketlerinde siyasiy mabüsler aqqında bilmek kerekler, dep qayd etti.
«Bu insanlarnıñ ikâyelerini bilmek kerekmiz. Olar apiste olsa da, olarnıñ insan ikâyeleri bar», – dedi o.
Cepparnıñ aytqanına köre, bu sergini eñ bir çoq insan, şu cümleden çetelde körgen edi.
Ekspozitsiya taqdim etilgen soñ Cemilev istegen er keske Qırım tarihçısı Gülnara Bekirova ve Ukraina haber siyaseti neşir etken «Mustafa Cemilev. Liderniñ yolu» kitabını imzaladı.
Mustafa Cemilev
Ekspozitsiya işğalden qurtaruv ve Qırımnıñ haber boşluğınıñ reintegratsiya meselelerine bağışlanğan halqara konferentsiya çerçivesinde keçirildi.