Qırımtatar halqınıñ milliy lideri Mustafa Cemilev “Diplomatiyadaki yararlıqları içün” çeh medal ile mukâfatlanğan. Qırım.Aqiqat mühbiriniñ haber etkeni kibi, mukâfatnı Cemilevge fevralnıñ 25-nde Kyivde Çehiyanıñ Ukrainadaki elçisi Radek Matula bergen.
Мустафа Джемилев на церемонии вручения ему медали
“Diplomatiyada yararlıq içün” medal Çehiyanıñ Tış işler nazirligi çeh diplomatiyanıñ inkişafına “isse” içün çeh ve çetel erbaplarğa bere.
“Bu, lâyıq şekilde alğan mukâfatlarıñızdan biri olğanını añlayım. Avropanıñ merkezinden halqıñıznıñ adından apqan er şeyiñizge ürmet ve sayğı kösterip bu medalni beremiz”, – dedi elçi mukâfatlav merasiminde.
Your browser doesn’t support HTML5
Почему Джемилева считают легендой. Объясняем
Öz nevbetinde Mustafa Cemilev elçige minnetdarlıq bildirdi ve şunı qayd etti: “Bu mukâfat büyük destektir ve dünya Qırım işğal etilgenini unutmağanını ve toprağımız ertemi, keçmi azat etilecegini bir daa köstere. Yedi mahkümiyetinmniñ arasında eki danesi Çehoslovakiyanıñ işğaline qarşı çıqanım içün olğanınadan ğurur duyam”.
Mustafa Cemilev Çehiya elçisine qırımtatar çolmekçisi Rustem Skibin yapqan tepsini bağışladı.
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.