Rusiye ordusı gece Kyivge ballistik raketa ve dronlarnen ücüm etti, soñki malümatqa köre, bir kişi elâk oldı, 24 insan yaralandı, dep bildirdi şeer yolbaşçısı Vitaliy Klıçko.
Onıñ aytqanına köre, yaralanğan 15 kişi hastahanege alındı, dördüniñ alı ağır.
Kyiv şeer arbiy memuriyeti bildirgenine köre, Kyivniñ Ğolosiyıvskıy, Obolon, Desnânskıy ve Svâtoşınskıy rayonlarında 7 yerde ücüm aqibetleri qayd etile.
Kyiv şeer arbiy memuriyetiniñ malümatına köre, Ğolosiyıvskıy rayonında ammiak töküldi. İlk malümatqa köre, ücüm neticesinde 300 litr madde olğan sistema zarar kördi.
Devlet fevqulâde vaziyetler hızmeti bildirgenine köre, qurtarıcılar armaturanı qapattı, eali içün bir telüke yoq.
Bu rayonda anbar yıqıntıları altından yaralanğan eki kişi çıqarıldı. Anda daa insanlar ola bile. Qıdıruv-qurtaruv tedbirleri devam ete.
Devlet fevqulâde vaziyetler hızmeti bildirgenine köre, Svâtoşin rayonında tükânlardan biriniñ anbarı yandı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.