Bazarertesi künü, oktâbrniñ 26-nda, Kyivdeki Rusiye elçihanesi ögünde «KrımSOS» cemaat teşkilâtınıñ faalleri «Find and Free» kampaniyası çerçivesinde işğal etilgen Qırımda hırsızlanğan insanlarnıñ tuvğanları ve yaqınlarına qol tutmaq içün 51-inci aktsiyanı keçirdi.
Tedbir teşkilâtçılarınıñ Qırım.Aqiqatqa bildirgenine köre, aktsiya «Qorqunen sarılğan yarımada ikâyeleri» adı altında keçirildi. Faaller Rusiye elçihanesi ögünde Qırımda «başqa fikirlerni ve tirenüvni bastırmaq içün» insanlarnı qorquzalar, dep tarif etti.
Aktsiya iştirakçileriniñ hatırlatqanına köre, işğal devamında yarımadada 44 insan hırsızlandı, 15-i alâ daa ğayıp olğan olaraq biline.
«2014-2016 seneleri hırsızlanğan altı insan ölü tapılğan edi: Reşat Ametov, Edem Asanov, Bilâl Bilâlov, Memet Selimov, Osman İbragimov ve Cohar Melâsanov. Aktsiya bu facialı adiselerge bağışlandı. Aktsiya vaqtında KrımSOS faalleri 2014 senesi oktâbrniñ 3-nde hırsızlanğan Eskender Apselâmov aqqında hatırlattı», – dep bildirdi teşkilâtçılar.
Aktsiyada eski siyasiy mabüs İsmail Ramazanov iştirak etti. O, Ukraina akimiyetini «işğal altındaki Qırımda insanlarnı hırsızlağanından qabaatlı olğanlar üzerinde ğıyabiy mahkeme esnasını başlatmasına» çağırdı.
Aktsiya bitken soñ faaller elçihane kirişinde Halloween qabaq fenerçiklerini bu yerden «yaramay küçlerni» quvuv timsali olaraq qaldırdı.
Ukraina Tış işler nazirligi dünya toplulığını işğal etilgen Qırımda ve Donbas topraqlarında insanlarnıñ hırsızlanmasına diqqat ayırmasına çağırdı. Bu beyanat müessiseniñ resmiy saytında Hırsızlanğan insanlar künü munasebetinen derc etildi.
Qırım işğalinden soñ yarımadada insanlar, hususan qırımtatarlar hırsızlanıp başlandı. Qırımdaki Rusiye Tahqiqat komiteti «yarımadada qırımtatarlar kütleviy şekilde hırsızlanmay», dep bildire.
Alâ daa haber alınmağan ğayıp olğan insanlar cedveli derc etilgen edi. Valeriy Vaşçuk, İvan Bondarets, Vasiliy Çernış, Timur Şaymardanov, Seyran Zinedinov, İslâm Cepparov, Cevdet İslâmov, Eskender Apselâmov, Fedor Kostenko, Muhtar Arislanov, Arlen Terehov, Ruslan Ganiyev, Arsen Aliyev, Eskender İbraimov ve Ervin İbragimov.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.