Rusiye ordusı gece Ukrayinanıñ energetikası ve kritik infrastrukturasına 39 ballistik raketasınen ve 120 dronnen ücüm etti, dep bildirdi Ukrayina prezidenti Volodımır Zelenskıy.
Onıñ aytqanına köre, Kyiv, Kyiv vilâyeti ve Harkiv darbelerge oğradı, elektrik energetika kompleksiniñ 26 elementinde ve cermay kompleksiniñ dört obyektinde obyekt ve donatmalarnıñ büyük zararları qayd etildi.
"Büyükliginen bilingen ve kösterişli bir darbe – Rusiye Amerikağa bu qadar sayğısız olğanını daa köstermegen edi. Rusiye Amerika prezidentiniñ beyanatını küçlü dep saymaya. Eñ az 600 biñ kişi şimdi, ne yazıq ki, elektrikasız otura. Daa büyük söndürüvler ola bile", – dep yazdı o, Telegramda.
Zelenskıynıñ bildirgenine köre, Ukrayina ABDden ve dünyada er kesten "aqiqatqa köz yummamağa, cevap bermege ve sert bir cevap bermege" rica ete.
"Rusiye kerginlikni toqtatuv imkânını qaçırıp, yoq etüv cenkini devam ettirmege istedi. Prezident Trumptan Rusiyege qarşı küçlü sanktsiyalar kirsetmege rica etemiz, em de keçenleri qabul etilgen ve imzalanğan Lindsey Graham qanunı buña imkân bere ve belgiley. Amerika Prezidentiniñ küç, adalet ve istilâcığa basqı sayesinde barışıqnı yaqınlaştırmaq içün küçlü ve yeterli aletleri bar", – dep qoştı prezident.
Oktâbrniñ 14-nde saba Kyivde raketa telükesi olğanından ava telükesi ilân etildi.
Kyiv şeer yolbaşçısı Vitaliy Klıçko bildirgenine köre, Kyiv ve vilâyetiniñ energetika obyektleri ballistika ücümine oğradı, ışıq söndürüvleri bar. Şeer akimiyeti haber etkenine köre, Kyivde atış sebebinden elektrik naqliyatınıñ bir qısmı çalışmay.
Oktâbrniñ 13-nde saat 22:40-larda Kyiv ballistik raketalarnıñ bir qaç darbesine oğradı. Oktâbrniñ 12-nde olğanı kibi, raketa telükesi tenbisi vaqtında kelmedi – bu vaqıtta Ukrayina paytahtında uçucısız ücümi telükesi manasını taşığan telükeniñ "sarı" seviyesi bar edi.
Haber etilgenine köre, Desnânskıy rayonında raketa 9 qatlı evge ücüm etti, anda, soñki malümatqa köre, eki insan elâk oldı, 20-den çoq kişi yaralandı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.