«Kyiv-Moğıla akademiyası» Ukrayina Milliy universitetinde bu oquv yılına qırımtatar tili saylama ders olaraq berilip başlandı. Bu aqta aliy oquv yurtunen işbirligi añlaşmasını yapqan Qırımtatar resurs merkezi bildirdi.
«Ortaqlarımıznıñ memleketimizniñ eñ muvafaqiyetli universitetlerinden birinde qırımtatar tiliniñ inkişafına yardım etkenlerine can-yürekten quvanamız», – dep yaza Qırımtatar resurs merkezi.
Oca Ayşe Arnautovanıñ aytqanına köre, universitette «qırımtatar medeniyetiniñ tolu idraqını şekillendirmek içün zemaneviy oqutuv usulları ve tedqiqat yanaşuvları» qullanılacaq.
«Şunı eminliknen bekley bilemiz, «Kyiv-Moğıla akademiyası» Ukrayina Milliy universitetinde studentlerniñ ihtiyacları ve imkânlarına esaslanıp, qırımtatar tilini zemaneviy oqutuv usulları kirsetilecek, qırımtatar medeniyetiniñ ukrayin kimliginiñ ayırılmaz parçası olaraq tolu idraqınıñ şekillenmesine yardım etecek ilmiy tedqiqatlarğa yañı yanaşuvlar olacaq», – dedi Arnautova Qırımtatar resurs merkezine.
Onıñ qayd etkenine köre, qırımtatar tiliniñ ögretilmesi «Ukrayina topraq bütünligini tanıma» ve «tamır qırımtatar halqına ürmet» adımı ola.
2025 senesi aprel ayında Ukrayina Nazirler şurası qırımtatar tiliniñ yañı imlâsını tasdıqladı.
Evel berilgen malümatqa köre, qırımtatar Vikipediyasınıñ 17 yılı munasebetinen 2025 senesi yanvarniñ 12-nden 25-ne qadar entsiklopediyanı tolduruv marafonı keçti.
Kanadadaki Albert universiteti Kanada ukrayin studiyaları institutı çerçivesinde çalışqan milliy tedqiqatlar fakultetinde qırımtatar studiyaları stipendiya programmasını açtı, dep bildirgen edi.