Ukraina, islâm dünyasınıñ memleketleri ile işbirligini terenleştirmek içün İslâm işbirligi teşkilâtında közetici statusını almağa istey.
Bu aqta noyabrniñ 2-nde Ukraina Tış işler naziriniñ birinci muavini Emine Ceppar İİT baş kâtibi Yusuf Bin Ahmed El Useymim ile videokonferentsiya rejiminde kerçekleştirgen muzakerelerde ayttı.
«Yaqın kelecekte İİT közeticisi statusını almağa isteymiz, bu itibarlı birleşmeler ile qurulış formatında daa sıqı koordinatsiyağa ve aza devletleri ile eki taraflı seviyede munasebetlerimizniñ terenleşmesine yardım etecektir», – dedi o.
Your browser doesn’t support HTML5
Ceppar: Meclis «Qırım platformasında» müim rol oynamalı (video)
Tış işler nazirliginiñ haberinde qayd etilgenine köre, Ukraina közetici statusını almaq içün talabını yañarttı.
Muzakere vaqtında taraflar Kyivniñ Qırımnı işğalden qurtaruv halqara meydançığınıñ quruluvını da laf etti.
Ceppar, İİT baş kâtibine Qırım yarımadasındaki vaziyet aqqında tafsilâtlı malümat berip, subetdeşiniñ diqqatını «işğalci memuriyetniñ işğalge razı olmağan yarımada sakinlerine qarşı devam etken repressiya ve taqiplerge» celp etti. Qayd etildi ki, hususan diniy sebeplerden eñ çoq qırımtatarlar taqip etile.
İİT 1969 senesi quruldı, al-azırda teşkilât erkânına ealileri tahminen 1,6 mlrd insan olğan 57 musulman devleti kirmekte. Teşkilâtnıñ esas maqsadı musulman memleketleriniñ siyasiy, iqtisadiy, medeniy ve diniy saalarda teren işbirligini temin etmektir.
Hatırlatamız, Ukraina Tış işler naziri Dmıtro Kuleba Avropa naziri ve Frenkistan Tış işler naziri Jean-Yves Le Dria ile telefonda laf etip, Frenkistannı «Qırım platformasınıñ» işinde iştirak etmesine davet etti.
Avropa tış faaliyeti hızmetiniñ siyasiy müdiri – baş kâtip muavini Enrique Mora bildirgenine köre, Avropa Birligi Ukrainanıñ Qırımnı işğalden qurtaruv platformasını qurmaq teşebbüsine tolusınen qol tuta.
Hatırlatamız, oktâbrniñ 29-nda Ukraina Avropa Birligindeki ortaqlarına ve NATOğa «Qırım platformasını» taqdim etti – bu yañı halqara teşebbüs yarımada işğaliniñ bitmesine yardım etmeli.