Oktâbrniñ 21-nde aqşam keç saatlarında endirilgen Rusiye darbeleri neticesinde Kyivde bir kişi elâk oldı, 22 insan yaralandı, aralarında dört bala bar, Devlet fevqulâde vaziyetler hızmeti.
Qurtarıcılar paytahtnıñ altı rayonına qarşı ballistik darbeler aqqında bildire, yanğınlar çıqtı ve yıquvlar bar.
"Dnipro rayonı. Bir kişi elâk oldı, bir bala hastahanege alındı. Ev ve maşinalar zarar kördi, mesken ve mesken olmağan binalar yandı. Daa beş kişi yaralandı.
Darnıtsâ rayonı. Naqliyat infrastrukturası zarar kördi. Yaralanğanlar yoq.
Svâtoşın rayonı. Mesken olmağan bina ve restoran kompleksi yana. 1100 metr kârelik meydanda yanğın söndürildi.
Obolon rayonı. Mesken olmağan binalar zarar kördi, yanğınlar çıqtı. Eki insan yaralandı. Yanğınlar söndürildi.
Peçersk rayonı. Binalar, acele yardım maşinası ve keşişhane zarar kördi. Sekiz insan yaralandı, üçü bala.
Ğolosiyıvskıy rayon. Mesken olmağan binağa yapılğan darbe neticesinde altı insan yaralandı", – dep aytıla haberde.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.