Noyabrniñ 6-nda Rusiyeniñ Kursk vilâyetinde Ukrayina arbiyleriniñ ücümi başlağanına üç ay oldı. Ukrayina Silâlı Quvetleriniñ Baş Komandanı Oleksandr Sırskıy 717 Rusiye arbiyi esir alınğanını ve 8 biñge yaqın adam öldürilgenini bildirdi.
Baş komandan bu yönelişte 20 biñden ziyade Rusiye arbiyi öldürilgen ve yaralanğan, dep iddia etti.
Bu malümatnıñ mustaqil delili yoq, lâkin esir deñişüvi vaqtında, berilgen malümatqa köre, Kursk vilâyetinde esir alınğan 200-den ziyade kişi Rusiye tarafına qaytarıldı. Olarnıñ arasında askerlikke çağırılğanlar da bar edi.
Sırskıy Rusiye şimdi Kursk vilâyetinde 45 biñge yaqın asker toplağanını, em de anda Şimaliy Koreyadan asker yollağanını ayta.
Sırskiy operatsiyanıñ özüni profilaktik, Sumı vilâyetinde Rusiye askerleriniñ ücümine mania dep adlandırdı. Bundan evel Ukrayina prezidenti Volodımır Zelenskıy Kursk vilâyetine ücümni Rusiyeni barışıqqa mecbur etmek strategiyasınıñ bir qısmı dep adlandırdı. Ukrayina reberleri qayd eteler ki, memleket öz ögüne Rusiye topraqlarını ilhaq etmek maqsadını qoymay.
İzaatçılar, hususan ğarbiy arbiy talilciler em Ukrayina arbiyleriniñ Rusiye Federatsiyasınıñ Kursk vilâyetindeki muvafaqiyetini, em de bu operatsiya cebeniñ başqa yerlerinde Rusiye askerleriniñ ilerilevine keder etmegenini qayd ete edi. Hususan Donetsk vilâyetinde Rusiye arbiyleri soñki vaqıtları müim topraqlarnı alıp, ilerilemege devam ete.
Ukrayina kontrolindeki topraqlarda qalğan Rusiye vatandaşlarınıñ sayısı belli degil. Olğan malümatqa köre, eñ az yüzlernen insan aqqında laf kete. Kursk vilâyetiniñ akimiyeti cenk olıp keçken yerlerniñ 130 biñge yaqın sakininiñ tahliyesi aqqında ilân etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.