Ukrayina Tış işler naziri Dmıtro Kuleba Ukrayinanıñ bir sıra vilâyetlerine tünevinki ücümlerden soñ Rusiyeni "raketa terrorı" içün cezalamağa çağırdı.
"Rusiye irilemek içün areket ete ve pek büyük ğayıplar köre. Bu da bütün Ukrayina boyunca raketta terrorınıñ sebebi. Amma biz qorqmaymız, dünya da qorqmamaq kerek", - dep yazdı TİN başı.
O, Rusiyege qarşı yañı sanktsiyalarnıñ qoyuluvınıñ ve Ukrayinağa ağır silâlarnıñ teslimatınıñ devam ettirilmesiniñ kerekligini qayd etti.
"Rusiyeniñ raketa terrorı cezalandırılmalı", - dep qayd etti o.
Tünevin aqşam, mayısnıñ 3-nde, Rusiye arbiyleri altı "Ukrzaliznıtsâ" stantsiyasına raketa darbelerini endirdi. Demiryol hadimleri ve yolcular arasında yaralanğanlar yoq, demiryol infraterkibi ise zaraz körgeni içün trenler yolda keç qala, dep haber etilgen edi.
Ukrayina Silâlı Quvetleriniñ Baş ştabınıñ malümatına köre, Ukrayinanıñ naqliyat infratekrkibini yoq etmek içün tünevin Rusiye ordusı Dnipro, Kirovograd, Lviv, Vinnıtsâ, Zakarpattâ, Odesa ve Donetsk vilâyetlerindeki obyektlerge raketa darbelerini endirdi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.