Ukraina Tış işler naziri Dmıtro Kuleba ICTV telekanalınıñ «Svoboda slova» programmasınıñ yayınında Rusiyege işğal etilgen Qırımnıñ suv meselesini çezmesine yardım etmeycekler, dep bildirdi.
«Qırım yarımadasında olğan adise-vaqialarnı diqqatnen közetemiz. Elbette, andaki vaziyet daa kritik (suv teminatınen bağlı – QA), ve işğalci devlet tarafından onı al etecek bir alet de yoq. Amma biz Rusiyege onıñ işğalci olaraq problemini çezmesine yardım etmeycekmiz. Qayd etem ki, halqara uquqqa köre, işğal altındaki yarımadanıñ vaziyetinden tamamen işğalci devlet mesüliyetli», – dedi Kuleba.
Sabıq ABD Ukraina elçisi John Herbst Ukraina işğal etilgen Qırımda suv berilmesini toqtatuv siyasetini devam ettirmeli, dep ayttı, çünki bu Ukrainağa ait yarımada işğaliniñ toqatıluvı içün Rusiyege yapılğan basqınıñ müim qısmı ola.
Rusiye kontrolindeki Qırım ükümetiniñ suv hocalığı ve melioratsiya devlet komitetiniñ yolbaşçısı İgor Vayl işğal etilgen Qırımnıñ tabiiy aquv suv anbarlarınıñ üçte biri tolu, dep bildirgen edi.
Ukraina prezidentiniñ Qırım Muhtar Cumhuriyetindeki daimiy temsilciligi, Rusiye işğal etken Qırım ve Aqyarğa Şimaliy-Qırım kanalından suv berilüvi tek yarımada işğalden qurtarılğan soñ ola bile, dep hatırlattı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.