Ukrayinada barışıqnen bağlı üç taraflı muzakerelerniñ daa bir raundı Abu-Dabide (Birleşken Arap Emirlikleri) fevralniñ 4-nde ve 5-nde olacaq. Bu aqta bazar künü Ukrayina prezidenti Volodımır Zelenskıy bildirdi.
Onıñ aytqanına köre, bu haberni Ukrayina eyyetinden aldı. Zelenskıynıñ haberinde fevralniñ 1-nde Abu-Dabide körüşüv oldımı aytılmay. Bundan evel bütün taraflar – Rusiye, ABD ve Ukrayina – muzakerelerniñ yañı raundı bazar kününe planlaştırılğan, dep tasdıqlağan edi.
Ne Moskva, ne Washington Zelenskıynıñ muzakerelerniñ yañı künü aqqında haberini şimdilik izaatlamadılar.
Rusiye prezidentiniñ mahsus vekili Kirill Dmitriyev Florida ştatında ABD eyyetinen, hususan mahsus vekil Steve Witkoff ve Jared Kushnernen körüşti. Taraflar muzakerelerni "neticeli ve kostruktiv" dep adlandırdı.
Rusiye, Ukrayina ve ABD vekilleriniñ iştirakinen muzakerelerniñ ilk raundı Abu-Dabide yanvarniñ 23-24-nde oldı. Taraflar ilerilev aqqında bildirip, topraq meselesinde bir añlaşma yoq, dep aytqanlar.