Rusiye işğal etken Qırımda Rusiyeniñ Ukrayinağa qarşı keñ kölemli basuvınıñ iştirakçisi 17 yaşındaki Qırımlı Elvina Kravçenkonı öldürgeninde şübheli sayıla, dep bildire Rusiye kütleviy haber vastaları. Olarnıñ malümatına köre, qız qara qış ayınıñ başında ğayıp olğan, onıñ cesedi Rusiye arbiyi ile körüşüvge ketken soñ tapılğan. Silâlı quvetler ve Rusiye akimiyeti kontrol etken Qırım kütleviy haber vastaları bunıñ aqqında susalar. Qırımlı qıznı qıdırmağa yardım etken resurslarda bu aqta malümat yoq. Qırım.Aqiqat ne olğanını ve Qırımda insanlar Rusiye arbiyleri tarafından telüke duyalarmı, yoqmı, ögrendi.
Elvina Kravçenko qara qış ayınıñ birinci künlerinde ğayıp oldı. Bir qaç kün soñra onıñ cesedi tapıldı. Rusiye kütleviy haber vastalarınıñ malümatına köre, davağa Rusiye Federatsiyasınıñ Ukrayinağa qarşı keñ kölemlñ basuvınıñ iştirakçisinıñ alâqası bar eken.
"Musafirlikke ketip, tardada tapılğan"
Elvina Kravçenko Canköy ihtisaslı tehnikumınıñ talebesi, Canköy rayonınıñ Marino köyünde yaşay edi. Canköyniñ içrimaiy ağlarındaki saifelerde yazılğanı kibi, elâk olğan qıznıñ qorantası çoq balalı, sade keçine, balalarından biri saqat.
"Elvina daima anasına yardım ete edi: yatqan qardaşına baqıp, ev işlerini yapmağa yardım ete edi", — dep yaza qoranta içün yardım toplağan Qırımlı göñülli Yuriy Obozenko.
Ğayıp olğan kününden evel qız tuvğanlarına qomşu köyge babasını ziyaret etmege ketkenini aytqan asılında ise internetten bir yigitnen körüşmege ketken, dep yaza ASTRA Rusiye telegram kanalı.
"Qıznıñ tuvğanları bildirgenine köre, Elvina yaş yigitnen İnternette tanışqan, o da aynı şu künü onı körüşüvge davet etken. O vaqıttan başlap qız bağğa çıqmay başlağan. Bir qaç kün soñra Elvina tarlada tapıldı, qatil cesedini yaqmağa tırıştı", — dep bildire neşir.
Rusiye kütleviy haber vastaları ve içtimañy ağlardaki saifeler, Qırımlı qıznıñ öldürüvinde şübheli sayılğan 21 yaşındaki parağa askerlik yapqan rusiyeli Dmitriy P. Aqmescit SİZO-sında buluna.
Aqmescit SİZO-sı
ASTRA-nıñ malümatına köre, Dmitriy P. Samar vilâyetiniñ Tolyatti sakinidir. Ne vaqıt añlaşmanı imzalap, Ukrayina ile cenkleşmege ketkeni belli degil, amma "SVO" (Rusiyede Ukrayinağa qarşı keñ kölemli cenkni böyle adlandıra) videolarını öz içtimaiy ağlarında 2025 senesi çeçek ayında derc etmege başlağan, dep qayd eteler.
Onıñ bu dava boyunca açıq mevamı yoq. Rusiye Mudafaa nazirliginiñ vekilleri de bu aqta açıq şekilde aytmay.
Elvina bar edimi?
Rusiye kontrolindeki Qırım kütleviy haber vastaları Elvina Kravçenkonıñ öldürilüvi aqqında aytmaylar. Qara qış ayınıñ başında Qırımlı qıznıñ ğayıp oluvı ve qıdırıluvı aqqında haber etken Qırım qıdırma-qurtaruv otrâdınıñ "Poisk Krım" telegram kanalında şimdi bu haberniñ izi yoq. Ğayıp olğanlar tapılsa bile, olar bu aqta bildire ve olarnıñ ölümi ya da sağ olğanını qayd ete.
"Poisk Krım" ilânında, Elvina Kravçenkonıñ bulunğan yeri qara qış ayınıñ 4-nden berli belli olmağanı aqqında haber etilgen edi. Telegram kanalı da onı tarif ete edi.
Rusiye quvetçileriniñ resmiy menbaları Elvina Kravçenkonıñ öldürilüvi aqqında haber etmey. Rusiye kütleviy haber vastalarında, elâk olğan Qırımlı qıznı qıdırmaq içün onlarnen insan qoşulğanı, hastahanelerge telefon etkeni aqqında yazılsa da.
"SVO" yımşatıcı sebep
Rusiye Ukrayinağa basnıñ ilk künlerinden başlap Qırımnı arbiy merkezine çevirdi, andan ordu, silâ ve tehnikanı cebege yolladı. Qırımda arbiyler ve vatandaşlar arasında çatışmalar sıq-sıq ola. Amma, olarnıñ resonans cinayetlerine alâqası şimdige qadar bildirilmedi. Elvina Kravçenkonıñ davası — Rusiye akimiyeti ve quvetçileri tarafından qayd etilmegenine baqmadan, haber etilgen ilk dava.
Qomşu Rusiyede Ukrayina cebesinden qaytqan arbiyler öz memleketiniñ sivil ayatında kütleviy şekilde cinayet işler, dep bildire Rusiye kütleviy haber vastaları.
Rusiye arbiyleri Donetsk vilâyetiniñ Mariupol soqağında, Ukrayinağa keñ kölemli cenk vaqtında, 2022 senesi quralay
"Verstka" rus neşriniñ malümatına köre, Rusiye Federatsiyasınıñ Ukrayinağa qarşı arbiy areketleriniñ aman-aman dört yılı devamında "SVO" veteranları biñden ziyade insannı öldürdi ve yaraladı.
Rusiye Federatsiyasınıñ Ukrayinağa basuvı başlağanından berli eñ azından 1130 iştirakçisi "sivil" cinayetlerinde qabaatlandı. Neşirniñ malümatına köre, ükümlerniñ ekseriyetinde Rusiye mahkemecileri "SVO"nı "yımşatıcı sebep" olaraq tanığan.
Rusiyeniñ Ukrayinağa keñ kölemli basuvı başlağanından berli Rusiye cemiyetinde de mental deñişmeleri közetile. Atta cenkniñ tarafdarları arasında onıñ desteklenmesi menfiy duyğularnen beraber ola, dep iddia ete rus içtimaiyatçisi ve "rusiyelilerniñ devam etken cenkniñ menimsemede ne ve nasıl deñişti" aqqında araştırmanıñ müellifi Svetlana Yerpıleva.
Adamlarnıñ çoqusı "raatsızlıq, depressiya ve stress yaşaylar", — dep qayd ete o.
Qırım, 2022 senesi
Rusiye akimiyeti, Qırımda Ukrayina ile cenkleşmege istegenlerniñ sayısı arta, dep işandıra.
2026 senesiniñ başından Qırım yarımadasında RF Mudafaa nazirliginen añlaşma tizmege istegen vatandaşlarnıñ sayısı arta, dep haber ete Qırım kütleviy haber vastaları Cenübiy arbiy okrugınıñ matbuat hızmetine atıf etip.
Bu malümatnıñ kerçekligini teşkermek imkânsız, çünki Rusiye akimiyeti bu malümatnı gizley.