Rusiye işğal etken Qırımda Rusiye uquq qoruyıcıları taksi aydavcısınen Rusiyeniñ Ukrayinağa qarşı cenki aqqında laf etken er adamnı tuttı. Subet qaydı Rusiye mahsus hızmetleriniñ eline keçken eken. 2014 senesi Qırımda başlağan çaquvlar Rusiyeniñ Ukrayinağa qarşı büyük istilâsı vaqtında faalleşti, depe ayta Ukrayina aq qorçalayıcıları. Tutulğan kişi aqqında neler belli ve onı nasıl bir ceza bekley, Qırım.Aqiqatnıñ maqalesinde tarif etemiz.
Qırımnıñ Rusiye akimiyeti 2022 senesinden başlap qırımlılar "Rusiye prezidenti Vladimir Putinge ve siyasetine, şu cumlden Rusiyeniñ Ukrayinağa qarşı büyük istilâsına qoltutalar, dep işandıralar. Amma kerçekte yarımadada cenkke qarşı çıqqan insanlarnıñ taqipleri toqtamay.
Avgust ayında Z-pablikleri "Ukrayinanıñ qaytuv tarafdarını" tutuldı, dep ilân etti. Olar FSB hadimleri evinde beti yerge yatqızğan er adamnı tutqan videonıñ bir parçasını derc etti. Sebebi taksi aydavcısınen subet oldı, qaydı Rusiye uquq qoruyıcılarınıñ eline keçti.
"Rusiyede büyük bir k.t olacaq"
Cenkke qoltutqan saifeler tutulğannıñ şahsiy malümatını aydınlattı – onı Aqyarnı Andrey Pavlük dep adlandırdılar. Açıq menbalarda bu insan iş adamı olaraq keçe.
O ve taksi aydavcısı arasında keçken subet parçası aydınlatılğan. Erkek sesi Rusiyeniñ Ukrayinağa qarşı başlatqan cenkiniñ menfiy aqibetlerini "Qırımda tezden körecekler", dep ayta.
Donetsk vilâyeti Mariupol soqağında Rusiye tankı, 2022 senesi mayıs ayı
"Tezden özüñ er şey körip añlarsıñ. Rusiyede pek büyük k.t olacaq. Olmaycaq, şimdi endi bar. Qırımda kurort mevsimi yoq. Men eki gaz ballonı içün 10 biñ ruble berdim. K.t endi başlandı", – dep ayta qaydda erkek sesi.
O, Rusiye cermay zavodları ve Rusiyeniñ farqlı regionlarında Wildberries logistik anbarlarına Ukrayina darbeleri aqqında hatırlatıp, rusiyelilerni "Qırımdan quvacaqlar", dep emin olğanını ayttı.
Samara vilâyeti Novosemeykino qasabasında Wildberries anbarına yapılğan Ukrayina ücüminden soñ tuman, 2026 senesi avgustnıñ 2-si
"Sizni mından öyle bir aydaycaqlar. Asılında quvmaycaqlar – köpür olmağanda özüñiz mından qayıqlarnen (Keriç boğazından – QA) qaçarsıñız. <…> Men ketişattan memnünim – er şey istegeniñiz kibi: "Kyiv üç künde" ve bu qadar", – dep ayta ses subet qaydında.
Bu sözlerden soñ, ses qaydına köre, aydavcı yolcudan yol parasını istep, maşinadan tüşmesini talap etti.
Neticede Andrey Pavlükniñ evine FSB hadimleri keldi.
"Qırım Ukrayina olacağını tüşündi – Rusiye olğanını añlattılar"
Operativ videoda eñ az dört FSB hadimi formada ve silânen dairesine kirip, sakinini küçnen yerge yatqızdı. Qabaatı haber etilmey.
Andrey Pavlükniñ tutuluvına dair resmiy haber Rusiye uquq qoruyıcı resurslarında yoq. Onıñ fikri da yoq.
Z-pablikleri "video tovbesini" derc etti, anda Andrey Pavlük Rusiye bayrağı ögünde "Ukrayina" yazılı urbada ve elinde Ukrayina bayrağını tutıp, "Rusiye ava mudafaasınıñ iş fotoresimleri ve videolarını çıqardı" ve "Qırım Ukrayina olacaq", amma oña "Rusiye edi, bar ve olacaq", dep añlatqanlar, "dep itiraf ete".
"Krımskiy SMERŞ" Telegram kanalında derc etilgen video, Andrey Pavlük kamera ögünde "tövbe ete", 2026 senesi avgust ayı
Bu video göñülli olaraq çıqarıldımı tam belli degil. Andrey Pavlükniñ açıq izaatları yoq.
Böyle videolar Qırımda Rusiyeniñ cenkke qarşı fikirleri içün taqipleriniñ esas aleti ola.
Bu videolar Rusiye uquq qoruyıcılarınıñ "cenkke qarşı" davalarnıñ mabüslerine qarşı basqı neticesinde peyda ola, dep emin Ukrayina aq qorçalayıcıları.
"Zorlav bes-belli. Bu afularnıñ bir çoqu Rusiyege qoltutqan insanlarnı taqip etmege maqsat qoyğan resursta derc etile. Böyle videolar böyle resurslarda peyda olsa, insannı "işlegenler" demek. Bu insannıñ özü ve qorantası içün menfiy aqibetler qorquzuvlarınen yapıla. Şunıñ içün bu afular göñülli olmay, bu bir zorlav", – dep ayta Qırım aq qorçalayıcı gruppasınıñ Olga Skripnik.
Olga Skripnik
Ukrayinağa qoltutqanı içün açıq afu soramağa mecbur etilgen er dördünci qırımlı "qoşma aşalavğa oğratıldı", deyep bildirdi Irade Qırım aq qorçalayıcı teşebbüsi, yerli propaganda saifeleri ve mediada derc etilgen yüzlernen videonı incelep.
"Ayrı laflar bile taqip sebebi ola"
Andrey Pavlükniñ qabaatı ve alacaq cezası al-azırda tam belli degil. Qırımtatar resurs merkezi er adam aytqanları içün taqip etile, dep bildire.
"İşğalcilerniñ insannı nasıl tutqanını köstermesi pek körünüşli ola. Külkü, aşalav ve insannı açıq ihmal etüv repressiyalarnıñ propaganda yanı oldı. Aydınlatılğan videolarnıñ ardı-sıralığı erkekni aytqanları içün taqip etilgenini köstere bile. Bu adise Rusiye işğal etken Qırımda yaratqan qorqu ve cezasızlıq müitini daa bir kere köstere, Ukrayinanen bağlı ayrı laflar bile taqip içün sebep ola bile", – dep bildire Qırımtatar resurs merkezi.
Qırımda Rusiye uquq qoruyıcıları, arhiv fotoresimi
Z-pablikleri Andrey Pavlükke cinaiy taqipnen qorquzıp, onı daa evel "akimiyet hadimine qarşı aqaretlev ve zorbalıq qullanuvı" memuriy maddesine istinaden mesüliyetke çekilgenine esaslana. Bu davalarnıñ sebepleri isbatlanmağan.
Taksi aydavcısınen subet qaydında Andrey Pavlük olaraq tanıtılğan ses FSB hadimleri onı endi tutqan edi ve, aytqanına köre, başına çuval kiydirip, eki qaburğasını qırğanlar, dep ayta.
Viktoriya Veselova – RFE/RL içün yazğan jurnalistniñ telükesizlik maqsadınen qullanğan tahallüsi