Prezident Volodımır Zelenskıynıñ bildirgenine köre, Rusiye lideri Vladimir Putin Ukrayinağa qarşı cenkini bitirmege niyetlenmey ve Ğarp Putinge bir şey begendirmekte degil, Rusiyeni tutmaqta ısrarlı olmalı. Bu aqta o, BBC intervyüsında ayttı.
Putin büyük basqı altında olmasa, bu cenkni toqtamaycaqmı sualine cevap bergen Zelenskıy böyle dedi: "Em öyle, em öyle degil. Körecekmiz. Em öyle, em öyle degil. O, bunı istemey, amma "istemey" "yapmaycaq" demek degil. Allah bersin. Allah bersin, muvafaqiyetli olayıq".
Prezident Ukrayina ateş toqtatılması içün toprağını bermege razı olmaycaq, dep bildirdi.
"Buña başqaca baqam. Bunı tek topraq körmeyim. Menim içün bu çıqmaq, mevzilerimizni zayıflatmaq, anda yaşağan yüz biñlernen insanımıznı taşlamaq demek. Buña öyle baqam. Eminim, bu çıquv cemiyetimizni bölecek", – dedi Zelenskıy.
O, Putinge "bu pauza kerek", dep qoştı. "Ne aytsa da, bu bir kerçek. Ve ğayrıdan tiklengence… Avropalı ortaqlarımız üç-beş yıl dey. Mence, bir-eki yılda ğayrıdan tiklenir, daa ziyade degil. Ya soñra qayda ketecek? Bilmeymiz. Amma uzatmağa isteycegi – bir kerçek", – dep bildirdi devlet yolbaşçısı.
Zelenskıy Putin Üçünci cian cenkini başlattı, dep ayttı.
"Topraqlarnı nasıl zapt eter ve onı nasıl toqtatmaq mümkün. Rusiye ğalebe qazanmasın dep degil, Rusiye öz dünyasını ketirip, insanlarğa begengen ve özleri saylağan ayatlarını deñiştirmege istey. Çünki men Putin bu cenkni endi başlattı, dep tüşüne ve tüşüne edi. Ve bih onı keniş, büyük, üçünci cian cenkinden toqtatamız. Biz bugün bir forpost oldıq ve Putinni toqtatamız", – dep qayd etti o.
Fevralniñ 18-nde aqşam YouTubeda derc etilgen Pirs Morgannıñ intervyüsında Zelenskıy Rusiyeniñ Ukrayinağa qarşı cenkini toqtatuv üç taraflı muzakereleriniñ nevbetteki raundı ABD ve Rusiye iştirakinen kene İsviçrede keçecek, dep bildirdi. Devlet yolbaşçısı muzakere kününi aytmadı, amma muzakerelerniñ Avropada keçirilüvi müim, dep qayd etti.
Jenevada (İsviçre) Ukrayina, ABD ve Rusiye arasında muzakereler yekünlengen soñ Zelenskıy arbiy meselelerde ilerilev oldı, amma siyasiy saalarda "pıtraqlı meseleler" qala, dep bildirdi. "Şimdilik fikirler farqlı, çünki muzakereler qolay olmadı… Yani arbiy yönelişte ilerilev eşittim, siyasiy yönelişte – dialog oldı, ileri ketmege añlaştıq, devam etmege añlaştıq. Anda, arbiy meselelerde kibi, bir ilerilev eşitmedim", – dep qoştı prezident ve gruppa Ukrayinağa qaytqan soñ tafsilâtlar olacaq, dep qayd etti.
Aynı vaqıtta, Ukrayina prezidentiniñ ofisi fevralniñ 20-nde kütleviy haber vastalarınıñ Volodımır Zelenskıy mesleatçılarınen laf etti, anda da cenkniñ daa üç yılına azırlanmaq kerek ve muzakereler muvafaqiyetli olmadı dep aytılğanına dair haberlerini inkâr etti. Ukrayina prezidentiniñ mesleatçısı Dmıtro Litvin ne mesleatçılarnen bir subet, ne de muzakerelernen bağlı menfiy bir izaat, ne de "üç yıl daa devam etecek cenk" vazifesi olmadı, dep ayttı. Onıñ aytqanına köre, bu bir yalan.
Rusiye prezidentiniñ yardımcısı Vladimir Medinskiy Rusiye devlet kütleviy haber vastaları ögünde çıqışta bulunıp, muzakereler "qıyın, amma iş" oldı ve körüşüvler devam etecek, dep ayttı.
ABD prezidentiniñ mahsus vekili Steve Witkoff Jenevada Ukrayina ve Rusiye arasındaki üç taraflı muzakerelerden soñ "ciddiy ilerilev" oldı, dep bildirdi.
"Eki taraf da liderlerine haber bermege ve añlaşma tizmek içün çalışmağa devam etmege razı oldı", – dep yazdı Witkoff muzakereler neticesinde X içtimaiy ağında.
Er angi tafsilâtlar ya da añlaşmalar aqqında haber etilmedi.
Fevralniñ 17-nde Jenevada ilk künü muzakerelerniñ siyasiy bloku yekünlendi, dep haber etildi. Washingtondaki menbalar Azatlıq Radiosına bildirgenine köre, Büyük Britaniya, Frenkistan, Almaniya ve İtaliyanıñ milliy telükesizlik mesleatçıları muzakerelerni közetti.
ABD cenkni bitirüvde aracı olmağa ğayret kösterse de, Rusiye sert talaplarından, şu cümleden Ukrayinanıñ Donbas toprağından vazgeçmesine azır olğanını köstermedi.
Ukrayina ABD ve Avropa ittifaqdaşlarından onı Rusiye istilâsından qorumağa yardım etecek küçlü telükesizlik kefaletlerini talap ete.