İşğal etilgen Qırımda 42 yaşında Bağçasaray rayonınıñ sakini, beş balanıñ babası, fevralniñ 12-nde tintüvlerden soñ tutulğan Nariman Seytaliyev Aqmescitteki SİZO-2-ge alındı. Bu aqta "Qırım birdemligi" ömür arqadaşı Zarema Seytaliyevanıñ aytqanlarına esaslanıp haber ete.
Tuvğanları SİZOğa mektüpler yolladı, amma şimdilik cevap yoq, dep qayd ete qadın. Nariman Seytaliyevniñ bir qaç hastalığı bar, hususan mide astı bezi hastası. Ekim diyeta yazdı, ilâc berdi ve tibbiy teşkerüv olmalı, dep ayttı.
Seytaliyev tutulmazdan bir qaç kün ögüne büyrekleri pek ağırğanı içün acele yardım çağırdı.
Hatırlatamız, Rusiye uquq qoruyıcıları fevralniñ 12-nde Qırımnıñ Bağçasaray rayonınıñ Ulaqlı (Glubokiy Yar) köyünde 42 yaşında Nariman Seytaliyevniñ ve Bağçasarayda aşçı Yunus Suleymanovnıñ evini tintti. Saba dörtte başlağan tintüvler bitken soñ ekisini alıp kettiler.
Aqmescitniñ Kiyev rayon mahkemesi erkekniñ sıñırlav tedbirini belgiledi. "Hizb ut-Tahrir" islâm siyasiy firqasınıñ faaliyetini teşkil etkeninde qabaatlanğan (Rusiye Federatsiyası Ceza kodeksiniñ 205.5 maddesiniñ 1-inci qısmı) Seytaliyev aprelniñ 11-ne qadar apiske alındı. Onı 20 yılğa qadar azatlıqtan marum ete bileler.