Rusiye tarafdarı qırımtatar erbapları Qırımda Rusiye akimiyetiniñ siyasetine qoltutmaq maqsadınen qırımtatar cemaatçılığınen körüşmege devam ete. Bu faallikni yerli seviyede de keçirmege isteyler. Qırım.Aqiqat qırımtatar liderleriniñ fikrini bilip, bunıñ maqsadını ve işbirlikçiler istegenine irişip olurmı añlamağa istedi.
Qırımnıñ Rusiye yolbaşçısı, «İnkişaf» qırımtatar cemiyetiniñ prezidenti Eskender Bilâlovnıñ Qarasuvbazarda keçirgen daa bir körüşüvinde Qarasuvbazar rayon şurasınıñ reisi Arsen Yunusov işğal etilgen Qırımnıñ Rusiye akimiyetiniñ ilk şahıslarınıñ yardımınen böyle faallikniñ ilerideki adımlarınen bağlı qararlarnı qabul etti.
«Qırımnıñ mesken yerlerinde çalışmaq içün böyle milletlerara missiyalarnı keçirmek içün teşebbüs seslendirildi», – dep bildirdi Rusiye tarafdarı faal Zaur Smirnov.
Zaur Smirnov, Rusiye tarafdarı
Arsen Yunusov körüşüvde şunı qayd etti: «Kergin halqara vaziyetke baqılsa, bugün prezidentimizge qoltutmaq ve birleşip, memleketimizge çıqqan vazifelerni yerine ketirmesi içün bütün millet ve din vekilleriniñ ğayretlerini birleştirmek kerekmiz».
Qırımtatar Milliy Meclisiniñ reis muavini İlmi Umerovnıñ fikirince, işbirlikçiler «qırımtatar halqını boysundırıp olamaz».
İşbirlikçilerniñ artqan faalligi Putin rejimine sadıq qalğanını köstermege, öz amanlığı içün etrafında olğan er kesni yoq etmege azır olğanınen bağlıdırİlmi Umerov
«Zaur Smirnov mesken yerlerde işbirlikçiler nasıl bir iş yapacağını aytmadı. Ebet, olarğa Rusiyede qabul etilgen sıñırlardan çıqmağa kimse izin bermeycek. Cenk ve raşizm propagandası – Qırımda şimdiki akimiyet içün bir norma. Bir qaç ay evelsi Ukrayına ordusınıñ Qırımğa kirmesinden qoruycaq Rusiye tarafdarı qırımtatarlarnıñ batalyonını qurmaq azır olğanları ilân etilgen edi. Batalyon qayda? Yoq ve olmaycaq. Milletlerara missiyalar aqqında aytıp, öz halqını boysundırıp olamazlar. İşbirlikçilerniñ artqan faalligi Putin rejimine sadıq qalğanını köstermege, öz amanlığı içün etrafında olğan er kesni yoq etmege azır olğanınen bağlıdır. Smirnov ve Bilâlov kibi soylarınıñ başqa çaresi endi yoq. Ukrayınağa bütün dünya yardım ete, işbirlikçiler işğalcilernen beraber cezasını çekecek», – dep izaatladı vaziyetni Qırım.Aqiqatqa Meclis reisiniñ muavini.
İlmi Umerov, Milliy Meclisiniñ reis muavini
Qırımtatar faali, sabıq siyasiy mabüs İsmail Ramazanov emin ki, qırımtatar işbirlikçileriniñ teşebbüsi muvafaqiyetsiz olacaq.
Qırımnıñ işğalden azat etilüvi ne qadar yaqın olsa, daa çoq asabiy areket yapalarİsmail Ramazanov
«Smirnov ve Bilâlovnıñ böyle lafları – bala gürültisidir. Qırımnıñ işğalden azat etilüvi ne qadar yaqın olsa, daa çoq asabiy areket yapalar. Regionlarda işbirlikçilerniñ faalligini teşkil etmege isteyler, amma olmaycaq. Qırımnıñ büyük şeerlerinde bir şekilde qoltutuv olğanını kösterip olsalar da, yerlerde qırımtatarlar bunı körmemezlikke ura. Halqımız işbirlikçilerniñ milletlerara birlik laflarınıñ fiyatını yahşı bile: müfti ve diger işbirlikçilerniñ çaquvlarınen insanlar apiske alınğanda, saba erte silâlı insanlar barışıqsever insanlarnıñ evlerine sürip kirgende, insanlar bu qanunsızlıq ögünde özüni imayesiz is etkende. Şunıñ içün em işğalden qurtaruv, em Rusiye saipleri ögündeki qorquğa baqmadan, işbirlikçiler bir şey yapıp olamaz», – dep bildirdi fikrini faal Qırım.Aqiqatqa.
İsmail Ramazanov, qırımtatar faali, sabıq siyasiy mabüs
Kefeli qırımtatar faali Osman Osmanov emin ki, teşkilâtçılar qırımtatar halqı qoltutmaycağını özü de añlay.
Aslında qırımtatar halqı işbirlikçilerge qoltutmayOsman Osmanov
«Halqımız ne Smirnov, ne Bilâlovğa bir vaqıt qoltutmaycaq. Olarnıñ faal olğanına dair aytqanları – Rusiye akimiyetinden bonus almağa devam etmek içün matbuat içün ve informatsion müit yaratmaq içün yapıla. Aslında qırımtatar halqı olarğa qoltutmay. Olar köylerge de barmay, barsalar bile, kimseni körmeyceklerini, halq olarğa kelmeycegini bileler», – dep qayd etti faal Qırım.Aqiqatqa.
Osman Osmanov, Kefeli qırımtatar faali
«Qırım birdemligi» cemaat birleşmesiniñ faali Enver Şerfiyevniñ fikirince, bu faallik – işbirlikçilerniñ Rusiye akimiyetine kerek olğanını kösterüv ıntıluvlarıdır.
Kreml hızmetçileri o qadar ğayret kösterip, qırımtatar halqına Rusiye akimiyetini öyle de sevdiremediEnver Şerfiyev
«Doquz yıl devam etken Qırım işğali vaqtında Kreml hızmetçileri o qadar ğayret kösterip, qırımtatar halqına Rusiye akimiyetini öyle de sevdiremedi. Bazı işbirlikçiler, hususan Qırım musulmanları diniy idaresinden bazıları istisna oldı, şimdi ise Rusiye akimiyetine kerek olğanlarını isbatlamağa mecburlar. Devlette çalışqanlar riayet etmege mecbur olsa da, Rusiyege sıcaq baqmay. Amma berilgen vazifeler içün Kremlge esabat bermek kerek, şunıñ içün bu körüşüvlerde işbirlikçiler böyle printsipke esaslana – esabat kerçek neticeden daa müim. Olar bücette çalışqanlarnı, Qırım musulmanları diniy idaresi kontrol etken bir qaç imamnı toplarlar, mına saña resim. Halq ise Rusiye akimiyetini istemegeni kibi, istemeycek», – dep paylaştı fikrini Qırım.Aqiqatnen faal.
Enver Şerfiyev, «Qırım birdemligi» cemaat birleşmesiniñ faali
Qırımlı faallerniñ qayd etkenine köre, Qırımtatar Milliy Meclisiniñ faaliyeti Kremlni pek qasevetlendire. Qırımda qırımtatar qorantaları Rusiye küç müessiseleriniñ nezareti altında buluna. Mustaqil ekspertlerniñ fikirince, Qırım musulmanları diniy idaresi işğal etilgen Qırımda farqlı fikir ile küreş aleti olaraq areket ete.
MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.