Krıvıy Riğ şeerinde noyabrniñ 11-nde Rusiye ballistik raketası urğan beş qatlı mesken binanıñ yıqıntılarından qadın ve üç balasınıñ cesedi çıqarıldı, dep haber ete yerli akimiyet.
Rusiye ordusınıñ Krıvıy Riğ şeerine qarşı ücümi neticesinde beş qatlı binanıñ kirişi yıqıldı. Akimiyet 14 insannıñ ölümi aqqında haber etti. «Teessüf ki, körgenimiz kibi, elâk olğanlar bar», — dep yazdı Krıvıy Riğ mudafaa şurasınıñ reisi Oleksandr Vilkul.
Qurtarıcılar yıqıntılar tübünden başta qadınnıñ cesedini çıqardı. Bu aqta noyabrniñ 11-nde aqşam belli oldı. Üç balası da evniñ yıqıntıları tübünde qalğandır, dep tahmin etildi.
Noyabrniñ 12-nde saba qurtarıcılar olarnı da taptı. «Bir kün evelsi şeerge yapılğan raketa ücümi üç insannıñ canını aldı. Qurtarıcılar toqtamayıp çalışalar. Daa bir balanı qıdıralar», – dep yazdı Dnipropetrovsk vilâyetiniñ arbiy memuriyet yolbaşçısı Serğiy Lısak Telegramda.
Soñra şeerniñ arbiy memuriyet yolbaşçısı Oleksandr Vilkul qurtarıcılar üçünci balanıñ cesedini çıqarğanlarını, bir yaşını bile toldurmağanını ayttı.
Yıqıntılarnı temizlev işi bitirildi.
Rusiye arbiyleri çeşit silâlardan muntazam sürette ukrayin regionlarına ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.