Kremlniñ Qırım mabüsleriniñ 31 soy-sopu, tuvğanları apishaneden qaytqanını körmeden vefat etti. Keçken sene orta küz ayında 27 ölü aqqında haber etilgen edi, dep haber ete Qırımtatar resurs merkezi.
“Soñki adiseler arasında — İvan Yatskinniñ anasınıñ ölümi. Qadın ağır hastalanğan edi, amma er kün oğlunı körecegine işanıp yaşadı. İvan eviñden 4 biñ kilometr uzaqlıqta tutula, amma onı anasınen vedalaşmağa yibermediler. Onıñ ölümi aqqında QRM-ne soy-sopları haber etti. O, oğlunıñ taqdiri tüşünip, devamlı qasevetlerden solıp ketti. Nevbetteki adise qırımtatar siyasiy mabüsi Raim Ayvazovnıñ qorantasındaki facia: onıñ qardaşı qaza neticesinde elâk oldı”, — dep aytıla haberde.
QRM-nde qayd eteler ki, bu facialar tesadüfiy degil — daima kerginlik, stress, maneviy yorğunlıq ve beklev Rusiye Federatsiyasında mahküm etilgen qırımlılarnıñ tuvğanlarınıñ sağlığını boza.
“Adaletsizlik, devamlı küreş, repressiv sistema ögünde küçsüzlik ve soñsuz beklev sebebinden siyasiy mabüslerniñ tuvğanları ümütlerini coya, bu yükke dayanıp olamayıp öleler”, — dep yaza QRM.
Bundan evel “KrımSOS” aq qorçalayıcı teşkilâtı, 2024 senesi Qırımda eñ azından 56 qırımlı Rusiye akimiyeti tarafından taqip etilgenini bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.