Rusiye prezidentiniñ matbuat kâtibi Dmitriy Peskov Ukraina prezidenti Volodımır Zelenskıynıñ Kyiv Türkiye prezidenti Recep Tayyip Erdoğan vastasınen Vladimir Putinge Ukraina azat etilüvini beklegen ukrainalı siyasiy mabüslerniñ cedvelini bergenine dair aytqanlarını tefsir etmege istemedi.
«Bunıñ tefsiri olmaycaq», – dep bildire Peskovnıñ aytqanlarını «RİA Novosti» Rusiye agentligi.
Erdoğannıñ Putinge cedvel bergeni aqqında Zelenskıy noyabrniñ 26-nda matbuat konferentsiyasında bildirdi.
«(Siyasiy mabüsler – QA) Cedvel Türkiyege berildi. Yaqında prezident Erdoğannen laf ettim. Rusiye prezidentinen körüşti ve alâqa gruppaları seviyesinde cedveller Rusiye tarafına berildi. Oña (Erdoğanğa – QA) teşekkürler bildirmege isteyim, çünki o, bunı rica etti, umumen ayttı, amma qırımtatarlarğa diqqat ayırdı, çünki bu onıñ şahsiy meselesidir. (Rusiyeden – QA) cevap bekleymiz, amma şimdilik yoq», – dedi Zelenskıy.
SEE ALSO:
«Qırımdan ğayrı er şeyni muzakere etemiz»Ukraina prezidenti, ABD prezidenti Joseph Biden Vladimir Putinnen laf etkende siyasiy mabüslerni azat etüv meselesini köterir, dep bekley.
Zelenskıynıñ Qırım kütleviy haber vastalarına bildirgenine köre, Kreml ukrainalı siyasiy mabüslerni, hususan qırımlılarnıñ Rusiye apsinden azat etüv esnasını «aqsata», dep aytqan edi.
Ukraina Yuqarı Radasınıñ insan aqları vekâletlisi Lüdmila Denisova Ukraina ve Rusiye arasında tutulğan şahıslarnı deñişüv muzakereleri Rusiye akimiyeti sebebinden aman-aman toqtatıldı, dep qayd etken edi.
Rusiye Tış işler naziri Sergey Lavrov işğal altındaki Qırımda insan aqlarınıñ bozuluvı aqqında laflar uydurıla, dep bildirgen edi. Qırımnıñ Rusiye yolbaşçısı Sergey Aksenov Qırımda siyasiy mabüsler «kesen-kes yoq», dep israr ete.