Rusiye prezidentiniñ mahsus vekili Kirill Dmitriyev devlet yolbaşçısı Vladimir Putinge Miamideki muzakerelerniñ neticeleri aqqında bildirdi, Moskva eñ yaqın vaqıtta Washingtonnen mevcut kanallarda bağlarını devam ettirecek, dep bildirdi Rusiye prezidentiniñ matbuat kâtibi Dmitriy Peskov.
"Şimdi devlet yolbaşçısına berilgen bu malümat esasında biz fikrimizni şekillendirip, bağlarımıznı devam ettirmelimiz", – dedi Peskov.
Kreml vekili "Rusiye tarafınıñ esas talaplarını ABD zenaatdaşlarına malüm", dep qoştı.
Kreml ABD, Ukrayina ve Avropa vekilleri azırlağan ve Ukrayina prezidenti Volodımır Zelenskıy taqdim etken barışıq añlaşmasınıñ leyhasını izaatlamadı.
Soñki aftaları ABD Moskva ve Kyiv arasında barışıq añlaşmasınıñ tizilmesini istey. Miami muzakerelerinden soñ Zelenskıy bir qaç vesiqanıñ draftı azır, dep bildirdi – hususan Ukrayina içün telükesizlik kefaletleri, bu cenkni bitirmek içün ğayrıdan tiklev ve esas çerçivenen bağlı.
Miamide Amerika taqımınen Rusiye vekilleri de körüşti. Kreml bu muzakerelerni ilerilev olaraq qabul etmege kerekmey, dep bildirdi.
Dekabrniñ 17-nde Rusiye Mudafaa nazirligi kollegiyasınıñ keniş toplaşuvında Vladimir Putinn Rusiye Ukrayinadaki arbiy maqsadlarına "şübhesiz" irişecek, dep bildirdi. O, Rusiye arbiy maqsadlarına irişmek ve cenkniñ "tamır sebeplerini" yoq etmek içün diplomatik vastalarnı saylar edi, dep ayttı. Putin Ukrayina ve Ğarp "muzakerelerden vazgeçse", Rusiye "tarihiy topraqlarını" arbiy vastalarnen "azat eter", dep ayttı.