Oktâbrniñ 8-nde saba Rusiyeniñ Kramatorskqa qarşı endirgen darbesi neticesinde eñ az 12 insan elâk oldı, dep haber etti Donetsk vilâyeti arbiy memuriyetiniñ yolbaşçısı Vadim Filaşkin.
"Saat 11:10-da elâk olğan 12 kişi ve yaralanğan 14 kişi aqqında belli", – dep yazdı o, Telegramda.
Soñra bildirgenine köre, saat 12:15-te elâk olğan 30 ve yaralanğan 18 kişi aqqında belli.
Filaşkin köstergen levhalar Rusiye snarâdınıñ şeer soqağında tam yolcu naqliyatına ücüm etkenini köstere.
Vilâyet yolbaşçısı Donetsk vilâyetinde qalğan er kesni Ukrayinanıñ daa telükesiz regionlarına tahliye olmağa çağırdı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.