Ukraina prezidentiniñ Qırım Muhtar Cumhuriyetindeki temsilciligi, qırımlılar içün Qırım ve Herson vilâyetiniñ memuriy sıñırında aphaneler açmaq kerek olğanını bildirdi. Bu aqta Ukraina prezidentiniñ Qırım Muhtar Cumhuriyetindeki vekili Anton Korınevıç Qırım.Aqiqat Radiosınıñ yayınında ayttı.
«Qırımdaki vatandaşlarımıznıñ esas Ukrainağa kelip, kerekli hızmet almağa, tuvğanlarını ya da dostlarını yoqlamağa aqqı bar, dep tüşünemiz. Kontrol keçiş noqtalarında aphaneler açılmalı, dep tüşünemiz, çünki Rusiye ilâclarınıñ keyfiyet ve fiyat problemlerini bilemiz. Bunı kerçekleştirirmiz. Şimdilik hızmet alanları ait olacaq devlet akimiyeti organlarınıñ meselesi al etilmedi», – dedi Korınevıç.
Onıñ qayd etkenine köre, bu leyha endi tasdıqlandı, ne vaqıt işke tüşürilecegi yekâne mesele ola.
«O, (leyha – QA) em Herson vilâyetiniñ em Qırım Muhtar Cumhuriyeti ve Aqyar şeeriniñ sakinleri içün yapıldı. Qırımlılar künde 24 saat, aftada 7 kün devamında Ukraina ekimleriniñ tevsiyelerini alsın isteymiz, çünki yarımadada em tibbiy hızmet, em ekim sayısı problemi bar», – dep qayd etti Korınevıç.
Hatırlatamız, Ukraina İç işler naziri Arsen Avakov, işğal etilmegen esas Ukrainada qayd olmağan ukrainalılarnı Donbastaki kontrol keçiş noqtalarından ve işğal etilgen Qırımnıñ memuriy sıñırından keçirmemege teklif ete.
Herson sıñırcılarınıñ Qırım.Aqiqatqa bildirgenine köre, memuriy sıñırdaki sıñırlavlarnen bağlı resmiy bir emir daa yoq.
Milliy telükesizlik ve mudafaa şurasınıñ kâtibi Oleksiy Danılov, karantin vaqtında işğal etilmegen esas Ukrainada qayd olmağan ukrainalılarnı Donbastaki kontrol keçiş noqtalarından ve işğal etilgen Qırımnıñ memuriy sıñırından keçirmemege teklif bar, dep tasdıqladı.
Ukrainada koronavirustan ölgen ilk kişi qayd etildi. Jıtomır vilâyetiniñ 71 yaşında qadın sakini can berdi.
Ukraina 48 saattan soñ çetel vatandaşları içün sıñırını qapatacaq, dep bildirdi Oleksiy Danılov.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.