Keçken künü Qırımda 13 yañı koronavirus hastası qayd etildi, dep bildirdi Qırımnıñ Rusiye yolbaşçısı Sergey Aksenov.
Onıñ malümatına köre, 8 hasta daa evel qayd etilgen yerlerde keçirilgen qırğılıq ile küreş tedbirleri ve laborator tedqiqi neticesinde tapıldı. Ekisi Sankt-Peterburgda ve Krasnoyarsktan kelgen 5 hasta keskin virus yuqunçı alâmetlerinen tibbiy yardım içün muracaat etip qayd etildi.
Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ malümatına köre, yañı hastalardan beşi Saq rayonında qayd etildi, anda yañı yer bar. Daa eki yer Aqmescitte qayd etildi, hastalanğanlar arasında tibbiyet hadimi bar. Krasnoperekop hastahanesinde çalışqan Aqşeyh rayonınıñ tibbiyet hadimi de hastalandı. Bundan sebep hastanen alâqada olması mümkün acele tibbiy yardımnıñ 29 hadimi işten uzaqlaştırıldı. Aluştada, Aqmescit ve Bağçasaray rayonlarında birer hasta bar. İslâm Terek rayonında da eki kişilik qoranta ocağı qayd etildi.
Böylece, Qırımda 272 koronavirus hastası qayd etildi. 24-ü çetelden keldi, 26-sı Rusiyeden keldi. Eki kişi vefat etti. Akimiyetniñ malümatına köre, daa eki hastanıñ ölüm sebebi belli degil, amma COVID-19 diagnozı qoyulğan edi. Aqyarda 135 kişi koronavirus yuqunçına oğradı, 65 insan tüzeldi, eki kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.